Maqta satyp alý úshin jeke turaqtandyrý qory quryla ma

ASTANA. QazAqparat - Maqta satyp alýǵa jekelegen turaqtandyrý qoryn qurý tıimsiz. Bul jaıynda Májilis depýtattarynyń saýalyna QR Premer-Mınıstriniń orynbasary – Saýda jáne ıntegratsııa mınıstri Seriek Jumanǵarınniń jaýabynda aıtylǵan, dep habarlaıdy QazAqparat tilshisi.

Onyń atap ótýinshe, maqta sharýashylyǵy máseleleri osy jyldyń 27 qazanynda Parlament Májilisi depýtattarynyń, ortalyq atqarýshy organdar (Indýstrııa jáne ınfraqurylymdyq damý, Saýda jáne ıntegratsııa, Aýyl sharýashylyǵy mınıstrlikteri, Básekelestikti qorǵaý jáne damytý agenttigi) ókilderiniń, maqta óńdeý kásiporyndary men maqta sharýashylyǵy basshylarynyń qatysýymen ótken keńeste qaraldy.

Kezdesý qorytyndysynda maqta ósirýshiler men maqta óńdeý kásiporyndarynyń basshylary saqtaýdy qamtamasyz etip, keıinnen 2023 jylǵy aqpanda naryqtyq baǵa boıynsha satyp alýǵa kelisken.

«Maqta sharýashylyǵynyń negizgi problemasy - suranys pen usynysqa baılanysty onyń naryqtyq qalyptasýyna oraı maqta baǵasynyń aýytqýy. Sonymen qatar, salany qoldaý maqsatynda bıyl 6 871 aýyl sharýashylyǵy taýaryn óndirýshilerge pestıtsıdter, bıopreparattar, tyńaıtqyshtar satyp alýǵa, sondaı-aq tuqym óndirýdi qoldaýǵa 2,1 mlrd teńge bólindi. Memlekettik qoldaý is-sharalary men salany damytý úshin bıznesti yntalandyrý boıynsha júrgizilip jatqan jumystardy eskere otyryp, maqta satyp alýǵa jekelegen turaqtandyrý qoryn qurý tıimsiz dep sanaımyz. Ol da tıisti ınfraqurylymdy salýǵa bıýdjetten qomaqty shyǵystardy talap etedi», - dedi Serik Jumanǵarın.

Foto: csiro.au