Maqta salasyndaǵy sharýashylyqtardy irilendirý kózdeledi - zań jobasy
ASTANA. QazAqparat - Maqta salasyndaǵy sharýashylyqtardy irilendirý qarastyrylýda. Bundaı másele «Qazaqstan Respýblıkasynyń keıbir zańnamalyq aktilerine maqta salasyn damytý máseleleri boıynsha ózgerister men tolyqtyrýlar engizý týraly» zań jobasynda qamtylyp otyr.
Bul týraly búgin atalmysh zań jobasynyń tanystyrylymy barysynda málim boldy.
Zań jobasyna bastamashylyq jasaǵan depýtattyń biri Rozaqul Halmuradovtyń aıtýynsha, Memleket basshysy Aýyl sharýashylyǵy mınıstrligine, jergilikti atqarýshy bılikterge usaq sharýa qojalyqtaryn irilendirý máselesin aıtyp keledi. Depýtattyń sózine qaraǵanda, sharýa qojalyqtary da buǵan qarsy emes, biraq barlyq problema jer máselesine kelip tireledi. Soǵan oraı, jerdiń menshik ıeleri men jer paıdalanýshylardyń qalaýy boıynsha paılyq jarna retinde jer ýchaskelerin engizýge bolady degen norma qarastyrylǵan.
«Maqta salasynda 30 myńnan astam agrarlyq qurylym bar. Olardyń 51 paıyzynda jer kólemi 1-5 gekta aýmaǵynda ǵana. 43 paıyzy 5-10 gektar aralyǵynda, al 93 paıyzy 1-10 gektar aralyǵynda bolyp otyr. Olarda aýyspaly egistik sekildi dúnıelerdi engizý asa qıyn. Degenmen, bulardy irilendirýge olardyń eshbireýi baryp otyrǵan joq. Negizgi kedergi - jer máselesi», - dep túsindiredi bul jaıtty depýtat. Onyń aıtýynsha, seriktestik nemese odaq qurý arqyly bul máseleniń oń sheshimin tabýǵa bolady. Sharýalar ózderiniń jerlerin joǵaltpaıdy.
«Sonymen qatar, sharýashylyqty irilendirýge áser etý maqsatynda memlekettik qoldaý aıasyndaǵy sýbsıdııany aýyl sharýashylyǵy taýaryn óndirýshilerdiń tańdaýy boıynsha tikeleı ózderine, ne aýyl sharýashylyǵy kooperatıvteri nemese seriktestikteri arqyly tóleý usynylady. Damyǵan Evropa memleketteriniń aýyl sharýashylyǵynda bundaı normalar keńinen qoldanylady. Zań jobasyndaǵy osy ózgerister men tolyqtyrýlar usaq sharýashylyqtardy irilendirýdegi alǵashqy qadam bolady dep oılaımyz», - deıdi R. Halmuradov. Onyń sózine qaraǵanda, ýaq sharýa qojalyqtary búgingi tańda memlekettik qoldaýdy durys ala almaı otyr. Al irilendirý saıasatynyń arqasynda osy baǵytta tıimdi nátıjeler kórinis berýi de múmkin.
