Maqta salasynda deldaldar qyzmeti shekteletin bolady - Májilis
ASTANA. QazAqparat - Maqta salasynda deldaldar qyzmeti shekteletin bolady. «Qazaqstan Respýblıkasynyń keıbir zańnamalyq aktilerine maqta salasyn damytý máseleleri boıynsha ózgerister men tolyqtyrýlar engizý týraly» zań jobasynda depýtattar osyndaı normany qamtýdy kózdep otyr.
Bul týraly búgin atalmysh zań jobasynyń tanystyrylymy barysynda málim boldy.
«Qoldanystaǵy zań boıynsha maqta óńdeý uıymyna shıtti maqtany maqta talshyǵy etip óńdeý jáne maqta qolhattaryn berý arqyly qoıma qyzmetterin kórsetýden basqa kásipkerlik qyzmetti júzege asyrýyna tyıym salynǵan. Bul tyıym norma maqta ósirýshi dıhandarǵa da, maqta óńdeý uıymdaryna da zııany bolmasa paıdasyn bermedi. Kerisinshe, maqta óńdeý uıymdarynan jergilikti bıýdjetke túsetin salyqtyń mólsheri azaıyp ketti», - deıdi Májilis depýtaty Rozaqul Halmuradov. Máselen, depýtattyń aıtýynsha, maqta salasyndaǵy bir ǵana «Aq-Altyn» korporatsııasy osy zań normasy kúshine engenge deıin jylyna 20-25 mln. teńge salyq tólep kelse, zań kúshine engennen soń salyq túsimi eki esege kemigen. Bul rette depýtat maqta baǵytynda arada júrgen deldaldar úshin salyqty tóleýdi aınalyp ótýge jol ashylǵanyn alǵa tartady.
«Buryn maqta óńdeý uıymdary shetelden nemese otandyq kásipkerlerden ınvestıtsııa tartyp, maqta egýdiń aldynda maqta ósirýshilermen fıýcherlik kelisimshart jasasyp, qajetti qarjy alatyn bolǵan. Kúzde alynǵan qarajattyń ornyna maqta shıkizatymen esep aıyrysatyn. Alaıda, kásipkerlikke tyıym salý týraly qoldanystaǵy norma iske qosylǵannan beri, maqta óńdeý uıymdary ondaı máselemen aınalysa almaı qaldy. Sol sebepti bul jerde deldaldar paıda bolyp, daıyn ónimdi satyp alyp, ony qaıta satýmen solar aınalysyp ketti. Sondyqtan da, qoldanystaǵy zańnan álgindeı tyıymdy alyp tastaý qajet», - deıdi R. Halmuradov.
