Maqta salasyn damytýǵa arnalǵan zań jobasy taza qazaq tilinde ázirlendi - R. Halmuradov
ASTANA. QazAqparat - Búgin Parlament Májilisinde «Qazaqstan Respýblıkasynyń keıbir zańnamalyq aktilerine maqta salasyn damytý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy bolyp ótti.
Atalǵan zań jobasyna birqatar depýtattar bastamashylyq jasaǵan bolatyn.
«Zań jobasy taza memlekettik tilde-qazaq tilinde ázirlendi. Jobanyń negizgi nusqasy qazaq tilindegi mátin ekenin atap aıtqym keledi», - dedi qujatty tanystyrǵan Májilis depýtaty Rozaqul Halmuradov. Onyń aıtýynsha, zań jobasymen «Qazaqstan Respýblıkasyndaǵy selolyq tutyný kooperatsııasy týraly», «Aýyl sharýashylyq seriktestikteri jáne olardyń qaýymdastyqtary (odaqtary) týraly» jáne «Maqta salasyn damytý týraly» zańdaryna ózgerister men tolyqtyrýlar engizý qarastyrylyp otyr.
Jalpy, zań jobasymen Qazaqstannyń maqta salasyn damytýdy memlekettik qoldaýdyń birqatar júıelik sharalary bekitiletin bolady. Al olardy qabyldaýdyń qajettiligi elimizdegi maqta salasynyń qazirgi ýaqytta quldyraı bastaýymen baılanystyrylady. Al mundaǵy basty problemalarǵa mamandar negizinen zańnamanyń jetildirilmeýin, qarjylandyrý júıesi tıimdiliginiń tómendigin, ákimshilik kedergilerdi, zamanaýı agrotehnıkalyq bilimdi engizýdiń jetkiliksizdigin aıtady.
«Zań jobasynyń jańalyǵyna kelsek, laýazymdy tulǵalar tarapynan sharýashylyq sýbektileriniń qyzmetine aralasýdyń zańdylyǵy men negizdiligin qamtamasyz etý maqsatynda «Zań buzýshylyqqa jaǵdaı jasaıtyn sebepter men sharttardy joıý týraly» Qazaqstan Respýblıkasy Bas prokýratýrasynyń nusqamasy bar. Sony basshylyqqa ala otyryp maqta óńdeý uıymyna ýaqytsha basqarý engizýdi sot sheshimimen iske asyrý qarastyryldy. ıAǵnı, qazirgi jaǵdaıda maqta óńdeý uıymdaryna ýaqytsha basqarý engizý ókiletti organnyń buıryǵymen bolyp kelse, endi biz ony sot sheshimimen iske asyrýdy usynamyz», - deıdi depýtat R. Halmuradov.
