Maqta salasyn damytý týraly zań qabyldana ma

ASTANA. KAZINFORM – Premer-mınıstr Oljas Bektenov Senat depýtattarynyń maqta salasyn damytý týraly zań qabyldaý usynysyna jaýap berdi.

- 2021 jylǵa deıin «Maqta salasyn damytý týraly» Zań qoldanysta boldy. Sonymen birge, maqta qolhattary júıesin jáne tıisti mehanızmderdi shamadan tys retteý, onyń ishinde kepilmen qamtamasyz etýge qoıylatyn shekteýler qarjy ınstıtýttary men maqta óńdeý kásiporyndary arasyndaǵy ózara is-qımyldyń buzylýyna ákelip, salanyń damýyna keri áserin tıgizdi, - dedi Úkimet basshysy.

Onyń atap ótýinshe, osyǵan baılanysty ákimshilik kedergilerdi azaıtý, ınvestıtsııalyq ahýaldy jaqsartý jáne óńdeý uıymdarynyń jumys isteý jaǵdaılaryn azaıtý maqsatynda atalǵan Zańnyń 2022 jyldan bastap kúshi joıyldy dep taný týraly sheshim qabyldanǵan.

- Qazirgi ýaqytta salany retteý «Agroónerkásiptik keshendi jáne aýyldyq aýmaqtardy damytýdy memlekettik retteý týraly» Zań jáne basqa da normatıvtik quqyqtyq aktiler aıasynda júzege asyrylýda. Osyny eskere otyryp, qazirgi ýaqytta jeke mamandandyrylǵan zańdy qabyldaý orynsyz dep sanaımyz, - dedi Oljas Bektenov.

Buǵan deıin senator Murat Qadyrbek Úkimetke naryqtyq ekonomıkaǵa saı barlyq taraptyń quqyǵy qorǵalyp, ádil básekelestik pen sapaly ónim alý úshin arnaıy maqta salasyn damytý týraly zań ázirleýdi usynǵan edi.