Maqta ósirýmen aınalysatyn 10 myńǵa jýyq aýyl sharýashylyǵy óndirýshisi memlekettik nesıelermen qamtyldy

Bul týraly «Azyq-túlik kelisimshart korporatsııasy» UK» AQ-nyń baspasóz qyzmetinen málim etti.

Kompanııanyń baspasóz qyzmetinen atap ótkendeı, 2010 jyly maqtanyń baǵasy 140 jyldyń ishinde sharyqtaý shegine jetti. 2010 jyldyń qazanynda Nıý-Iork qurlyqaralyq bırjanyń elektrondy saýdasynda maqtanyń baǵasy 3,1 paıyzǵa kóterilip, 1, 2854 dollarǵa jetti. Álemde maqta tapshylyǵy 2009-2010 jyldary 16,4 mln. teńniń mejesine jetti.

Qazaqstanda atalmysh shıkizatty óńdeý joǵary deńgeıde emes. Máselen, 2005 jyly toqyma jáne toqý ónerkásibiniń úles salmaǵy Qazaqstannyń ІJÓ-niń jalpy kóleminiń nebári 0,4-0,5 paıyzyn qurady jáne elde óndiriletin maqtanyń tek onnan bir bóligi ǵana ózimizde óńdeldi.

2000 jyldyń ortasynda Ońtústik Qazaqstanda maqta klasterin qurý qajettiligi týyndady. Ońtústik óńir maqta óndirýge qolaıly aımaq, al Qytaı, Azııa elderi, Reseı jáne basqa da kórshi memleketter ony ótkizýdiń áleýetti naryqtary bola alady. Dıqandarǵa memleket tarapynan aýqymdy kómekter de kórsetildi. Atap aıtqanda, 2010 jyly «Azyq-túlik kelisimshart korporatsııasy» maqta óndirisine 2 paıyzdyq mólsherlememen 2,5 mlrd. teńge nesıe bóldi. Ońtústik óńirlerde maqta ósirýshilerdi qarjylandyrý shaǵyn nesıelik uıymdarmen jańartylmaıtyn nesıelik jeliler jáne birjolǵy shaǵyn nesıeler túrinde júzege asyryldy. Bir gektar jerge shamamen 45 myń teńgeden keldi. Solaısha, memlekettik nesıelermen maqta ósirýmen aınalysatyn on myńǵa jýyq aýyl sharýashylyǵy óndirýshisi qamtyldy.

Qazaqstannyń baǵdary - maqta egininiń kólemin arttyrý ǵana emes, basty maqsat - elde maqta klasterin jolǵa (ósirý, óńdeý jáne daıyn ónim shyǵarý) qoıý. Bul rette, «Qazaqstan maqtasy» AQ (Azyq-túlik korporatsııasynyń 2007 jyly qurylǵan enshiles kompanııasy) eldiń maqta-toqyma ónerkásibindegi basty kásiporyn bolmaq. Kásiporynnyń negizgi maqsaty - eki jaqqa tıimdi baǵamen ónimderdi satyp alý arqyly dıqandarǵa kómek kórsetý. «Qazaqstan maqtasy» kompanııasy OQO-nyń Maqtaaral jáne Shardara aýdandarynda maqtany satyp ala otyryp, dıqandar úshin tartymdy bıznes-áriptesine aınaldy. Tórt jyl ishinde maqta shıkizatyn satyp alý baǵasy eki esege artty. Naqty aıtqanda, bir tonnasy úshin 45 myń teńgeden 107 myń teńgege kóterildi.

Onymen birge, kompanııa óz jetkizýshilerine tuqymdyq materıaldardy daıyndap berý qyzmetterin usynady. Eki jyl buryn«Azyq-túlik korporatsııasy» «Qazaqstan maqtasymen» birigip, Maqtaaral aýdanynda maqtanyń suryptyq tuqym materıaldaryn óndiretin zaýyt qurylysy boıynsha ınvestıtsııalyq jobany (jobanyń quny - shashamen 1,7 mlrd. teńge) júzege asyrdy. Kásiporynnyń bir jyldyq qýaty - 7 mln. tonna.