Maqta óńdeý uıymdarynyń kásipkerlik qyzmetti júzege asyrýyna qoıylǵan shekteýler alynady
«Zań jobasynda usynylǵan ózgeristerge kelsek, birinshiden, memlekettik basqarý deńgeıleri arasyndaǵy ókilettikterdiń arajigin ajyratý jáne maqta óńdeý uıymdaryn ýaqytsha basqarýdy engizý, uzartý jáne toqtata turý máseleleri boıynsha ókilettikterdi sotqa berý kezinde týyndaǵan kollızııalary joıylady. Ekinshiden, zań buzýshylyqqa jaǵdaı jasaıtyn sharttardy joıý maqsatynda maqta óńdeý uıymyna ýaqytsha basqarýdy engizýdi ýákiletti organ uıymyna emes, sot sheshimimen engizý kózdeledi. Úshinshiden, maqta naryǵyna qatysýshylar qataryna «maqta daıyndaý uıymy» degen uǵym engizý qarastyrylǵan», - dedi depýtat Rozaqul Halmuradov. Onyń túsindirýinshe, maqta daıyndaý uıymy - bul shıtti maqta satyp alýdy, daıyndaýdy júzege asyratyn zańdy tulǵa. Al búgingi tańda shıtti maqta óndiretin agroqurylymdardyń 99,5 paıyzy óz ónimin saqtaý ne qaıta óńdeý úshin zaýyttarǵa ótkizbeıdi, kez-kelgen treıderlik kompanııalarǵa shıtti maqta retinde aqshaǵa satady. Depýtattyń paıymynsha, ondaı treıderlik kompanııalardyń qyzmeti baqylaýdan tys qalǵan. Sonyń saldarynan óndirilgen shıtti maqta men maqta tazalaý zaýyttarynda óndirilgen maqta kóleminiń arasynda alshaqtyqtar paıda bolyp otyr. «Osyǵan baılanysty shıtti maqta satyp alýshylardy maqta naryǵyna qatysýshylar retinde engizý kerek», - dedi R. Halmuradov. Tutastaı alǵanda, zań jobasynda maqta óńdeý uıymdarynyń káspkerlik qyzmetti júzege asyrýyna qoıylǵan barlyq shekteýlerdi alyp tastaý usynylyp otyr. Bul olarǵa maqtashylardyń qajettiligine, maqta óndirisi jumystarynyń maýsymdylyǵyna den qoıýda ıkemdilikti qamtamasyz etedi.
