Maqta baǵasy ótken jylmen salystyrǵanda 2 esege ósti
Túrkistan oblysyna arnaıy kelgen Ózbekstan respýblıkasynyń tótenshe jaǵdaılar mınıstri, Prezıdent keńesshisi Tursynhan Qudaıbergenov pen Sý sharýashylyǵy mınıstri Shavkat Hamraev bastaǵan delegatsııa aýyl sharýashylyǵy salasyna serpilis ákelgen ózgeristerge kýá bolyp, maqtaly aýdandardyń sharýalarymen kezdesti. Elimizdiń ekologııa, geologııa jáne tabıǵı resýrstar mınıstri Serikqalı Brekeshov pen Túrkistan oblysynyń ákimi Ómirzaq Shókeevpen birge maqtaaraldyqtardyń búgingi tynys - tirshiligimen tanysty.
Byltyr Maqtaaral aýdanyndaǵy sý basqan egistik alqaptardy qaıta qalpyna keltirip, shıtti maqta egý jumystaryna kórshi elden qoldaý kórsetildi. Ózbekstan Respýblıkasynyń Jyzaq jáne Syrdarııa oblystarynan 40 arnaıy tehnıka men 250 tonna maqta shıti jetkizilip, sýy tartylǵan eldi mekenderdegi sharýalarǵa kómektesip, maqta daqylyn qaıta egip bergen edi. Kórshiden kelgen kómekti maqtaaraldyq dıqandar rızashylyqpen eske alady. Onyń ústine bıylǵy qýańshylyqqa qaramastan maqtaly aýdandardyń sharýalary aǵyn sýdy artyǵymen aldy. Sardoba apaty saldarynan Maqtaaral aýdanyndaǵy 7 myń 500 gektar egistik alqap zardap shekken bolatyn. Egistikke qaıtara maqta dánin sebý jumystary júrgizildi. Sol kezde Myrzashól topyraǵyna egilgen ózbekstandyq «Sultan» maqta surpy joǵary sapaly ónim berdi.
Arnaıy delegatsııa «Almat» sharýa qojalyǵynyń maqta terim alqabynda bolyp, dıqandarmen júzdesti. Qýańshylyqqa qaramastan aǵyn sýdy artyǵymen paıdalanǵan sharýalar bıyl mol ónim alýǵa nıetti.
Óńirde maqta baǵasy ótken jylmen salystyrǵanda eki ese ósti. Túrkistan oblysynda 18 maqta óńdeý zaýytynyń 200-den astam maqta qabyldaý beketteri arqyly 1 tonna shıtti maqta 300 myń teńgege qabyldanýda. Búgingi kúnge josparlanǵan egis kóleminiń 33 myń gektary terilip, 70 myń tonnadan astam ónim jınaldy.
«Byltyr Ózbekstandyq tehnıkanyń kómegimen topan sý basqan egistik alqabyna maqtaaraldyqtar maqta dánin qaıta seýip aldy. Kórshi aǵaıyndar tehnıkadan bólek, janar-jaǵarmaıyn, surypty shıtin de tegin berip otyrdy. Sol kezde shyǵynǵa ushyraǵan sharýalar úshin bul óte úlken kómek boldy. Kúndiz - túni tynbaı eńbek etkenniń arqasynda bıyl maqta bitik shyqty. Baǵa da kóterildi. Qazir kelisin 300-320 teńgeden satyp jatyrmyz. Kórshi Ózbekstan elimen kelisimge kelip, aǵyn sýdy artyǵymen aldyq. Osynyń barlyǵy Elbasynyń qoldaýymen, Memleket basshysynyń tapsyrmasymen, kórshi elmen ornaǵan dostyq qatynastyń arqasynda júzege asyrylyp jatqanyn bilemiz. Memleket qoldaýymen tyńaıtqysh pen janar - jaǵarmaı jetkilikti. El rıza. Dıqandar tabysyn arttyryp alatyn boldy», – deıdi «Baǵdat» sharýa qojalyǵynyń basshysy Dáýletbaı Jorymbetov.
Bıyl jalpy 110 myń ga jerden 280 myń tonna shıtti maqta terý josparlanǵan. Maqta talshyǵy Eýropaǵa eksporttalady. Sonymen qatar jıyn-terim jumystaryna 43 myń tonna janar-jaǵar maı bólindi. Onyń baǵasy lıtrine 172 teńgeden bosatylyp jatyr.
Ózbekstannan kelgen delegatsııa Myrzakent jańa móltekaýdanynda salynǵan 1200 oryndyq mektep qurylysymen tanysty. Onda ornatylǵan zamanaýı qondyrǵylar men mektepte endirilgen óńirde buryn-sońdy bolmaǵan jańa jobanyń múmkindikterin joǵary baǵalady. Jańa mektepke jınalǵan myrzashóldikter Maqtaaraldyń jańa keıipke enip, burynnan da ajarlana túskenin maqtanyshpen jetkizdi. Halyqtyń qıyndyq kezinde tynysh turmys izdep, basqa jaqqa údere kóshpegenin qýana aıtty.
«Qıyndyqtar umytylyp, týǵan ólkemiz burynǵydan da gúldenip keledi. Qanshama jańa ǵımarattar, emdeý mekemeleri salyndy. Aınala kókke oranyp, aýdanymyz ajarlana tústi. Ózbekstan halqymen ǵasyrlar boıy birge ósip kelemiz. Ol jaqta aǵaıyn-týys turady. Bir ózennen sý iship, bir aýamen tynystanǵan týys halyqpyz. Qıyndyqta kómek berip, qýanyshymyzdy da bólisip otyr», - deıdi Myrzakent aýylynyń turǵyny Shahzada Qurbanbaeva.
Sonymen birge oblys ákimi Ómirzaq Shókeev arnaıy delegatsııany Jetisaı qalasyndaǵy «Qydyr ata» jekemenshik emhananyń jumysymen tanystyrdy. Zamanaýı jabdyqtalǵan medıtsınalyq mekemede 120 emdelýshige deıin em qabyldaı alady. Klınıka dárigerleri 100 shaqyrym jerde ornalasqan Tashkenttik áriptesterimen tájirıbe almasyp otyrady.