Maqsut Nárikbaevtyń aty eshqashan umytylmaıdy - A.Daýylbaev
ASTANA. QazAqparat - Búgin Astanada zań ǵylymdarynyń doktory, professor, «QazGZÝ» AQ Prezıdenti, kórnekti qoǵam jáne memleket qaıratkeri Maqsut Sultanuly Nárikbaevtyń halqy, otbasy, týǵan-týystary men áriptesteri, onyń aıaýly shákirtteri professordy aqtyq saparǵa shyǵaryp saldy. Marqum Astanadaǵy Ulttyq panteonda jerlendi.
«Búgin biz belgili zańger, belgili memleket jáne qoǵam qaıratkeri, ómirde óte jaqsy adam bolǵan Maqsut Sultanulymen eriksiz qoshtasyp turmyz. Onyń ómiri qıyn, biraq, beker ótpegen ómir. 1940 jyly týǵan Maqsut Sultanulynyń balalyǵy soǵyspen talasa ótse, soǵystan keıingi aýyr jyldar jalyndaǵyn jastyǵyna tuspa tus keldi. Ol metallýrg te, qara jumysshy da boldy, Qazaq memlekettik ýnıversıtetin bitirgen soń, búkil ómirin zań salasyna arnady. Oqý bitirgen soń prokýratýrada tergeýshi, zań oryndarynda halyq sýdıasy, keıin Prezıdent Ákimshiliginde , Bas prokýratýrada jumys istedi, elimizdiń Joǵarǵy sotyn basqardy. Bul adam - halqyna aıanbaı qyzmet etken adam. Maqsut Sultanulynyń jarqyn beınesi áriptesteriniń, dostary men jaqyndarynyń, shákirtteriniń júreginen joǵalmaq emes. Maqsut Nárikbaevtyń aty eshqashan umytylmaıdy», - dedi marqumdy aqtyq saparǵa shyǵaryp salar kezde QR Bas prokýrory Ashat Daýylbaev.
M.Nárikbaevtyń jaqyndaryna kóńil aıta kelgen halyqtyń arasynda Joǵarǵy sot tóraǵasy Qaırat Mámı, Astana ákimi Ádilbek Jaqsybekov, Syrtqy ister mınıstri Erlan Ydyrysov, Bilim jáne ǵylym mınıstri Aslan Sárinjipovter de bar.
Esterińizge sala keteıik, keshe, 12 qazan kúni 76-ǵa qaraǵan jasynda zań ǵylymdarynyń doktory, professor, «QazGZÝ» AQ Prezıdenti, kórnekti qoǵam jáne memleket qaıratkeri Maqsut Sultanuly Nárikbaev dúnıeden ótti. Búgin tańerteń Qazaq gýmanıtarlyq zań ýnıversıtetinde marqummen qoshtasý rásimi ótti.
Taldyqorǵan oblysy Taldyqorǵan aýdanynyń Erkin aýylynda dúnıege kelgen. 1974 jyly S.M.Kırov atyndaǵy Qazaq memlekettik ýnıversıtetti zańger mamandyǵy boıynsha bitirip shyqty (qazir - ál-Farabı atyndaǵy QazUÝ) . Zań ǵylymdarynyń doktory (1998), quqyqtaný professory (2001), Halyqaralyq joǵary mektep akademııasynyń akademıgi (2001 jyldan bastap). M.Nárikbaev joǵary klasty bilikti sýdıa edi.
