Maqsut Quljanov Densaýlyq saqtaý ulttyq palatasynyń prezıdenti bolyp saılandy
ASTANA. 27 maýsym. QazAqparat - Densaýlyq saqtaý salasynda jumys isteıtin Qazaqstannyń qoǵamdyq uıymdary birigýde.
Olardyń múddelerine endi jańa qurylym - Densaýlyq saqtaý ulttyq palatasy ókildik etetin bolady.
Bul týraly Densaýlyqty damytý respýblıkalyq ortalyǵynyń baspasóz qyzmetinen habarlady.
Jańa qurylym «Atameken» Odaǵy» Ulttyq ekonomıkalyq palatasy janynan qurylyp, densaýlyq saqtaý salasynda qyzmet etip júrgen 200-den astam qoǵamdyq uıymdy biriktiredi. Densaýlyq saqtaý ulttyq palatasynyń prezıdenti bolyp medıtsınalyq ǵylymdar doktory, professor, AQTB/JQTB, kókjótel jáne bezgekke qarsy kúres boıynsha Ǵalamdyq qordyń múshesi Maqsut Quljanov saılandy.
Densaýlyq saqtaý ulttyq palatasy densaýlyq saqtaýdaǵy ózekti problemalardy sheshý jáne medıtsınalyq baǵdarlamalardy júzege asyrý úshin memlekettik organdarmen ózara áreket etetin bolady. Budan basqa, palata músheleri jobalardyń saraptamasyna jáne táýelsiz saraptamany ótkizýge, quqyqtyq jáne aqparattyq qoldaý kórsetýge, sondaı-aq ózge de kóptegen máselelerge qatysatyn bolady.
Juma, 29 maýsym kúni QR Densaýlyq saqtaý mınıstrligi men Densaýlyq saqtaý ulttyq palatasy arasynda yntymaqtastyq týraly kelisimshartqa qol qoıý josparlanǵan.
