Maksım Rojın: Prezıdenttiń eldi alańdatyp otyrǵan problemalarǵa qanyq ekeni sezilip tur

ASTANA. KAZINFORM –  Májilis depýtaty Maksım Rojın Prezıdenttiń Qazaqstan halqyna Joldaýy óz saılaýshylarymen kezdesýde kóterilgen máselelerdi qamtyǵanyn aıtady.

«Jaz boıy óńirlerdi aralaǵanymyzdy bilesizder. Men úsh óńirde boldym. Sol kezde saılaýshylar kótergen máseleniń basym bóligi búgingi Prezıdent Joldaýynda kórinis tapty. Tipti bizge qoıylǵan kóptegen suraqqa búgingi Joldaýda berilgen tapsyrmalar arqyly jaýap berildi deýge bolady», - dedi depýtat.

Májilis depýtaty halyqtyń kókeıinde jol men medıtsına sapasyna qatysty suraq kóp ekenin aıtady.

«Aýyl turǵyndary aýyl sharýashylyǵyndaǵy sýbsıdııa, aýyldaǵy bıznesti qoldaý máselesine baılanysty suraq kóp qoıady. Sonyń bári derlik Prezıdenttiń Joldaýynda qamtyldy. Memleket basshysy qoǵamda bar, eldi alańdatyp otyrǵan problemalarǵa qanyq ekeni sezilip tur», - deıdi Maksım Rojın.

Aıta ketsek, búgin Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» taqyrybymen Qazaqstan halqyna Joldaýyn jarııalady.