Maksım Rojın: Quryltaıdyń Ulytaýda ótýi – ıdeologııalyq turǵydan óte durys sheshim
«Alǵashqy quryltaıdyń Ulytaýda ótýi – ıdeologııalyq turǵydan óte durys sheshim. Eldiń birigýine, halyqtyń yntymaǵyn damytýǵa baǵyttalǵan quryltaı bolǵannan keıin, erteńgi jıynda sol baǵyttaǵy ıdeıalar aıtylady dep oılaımyn. Bul talqylaý platformasynyń kóp ózgesheligi bar. Buryn Ulttyq qoǵamdyq senim keńesinde Almatydan keletin músheleri az bolatyn. Al qazir quryltaıda 117 adam bar. Onyń ishinde ár aýmaqtyń azamaty bar. Olardyń barlyǵy jergilikti jerlerdegi máselelerdi biletin adamdar. Sonymen qatar, quryltaıda aıtylatyn oılar, pikirler men ýájderge ortalyq atqarýshy bılik nazar aýdaryp, tıisti shara qabyldaıtyn bolady. Quryltaı keminde jylyna bir ret ótýi kerek. Degenmen aı saıyn júrgiziletin mańyzdy jumystar bar. Jalpy bul jergilikti jerlerdegi túıtkildi máselelerdi talqylaıtyn oryn bolady dep senemin. Budan bólek, qazir qoǵamdy bólip jarǵan kelispeýshilikter jıilep tur. Sony sheshý – osy organnyń mindeti retinde bekitildi», - dedi Ulttyq quryltaıdyń múshesi.
Maksım Rojınniń aıtýynsha, Ulttyq quryltaı múshelerin QR Prezıdent Ákimshiligi jasaqtaǵan. Sondaı-aq, ol Quryltaı quramyndaǵy mamandarǵa jalaqy nemese ózge de tólemder berilmeıtinin aıtty.
Eske sala keteıik, búgin Memleket basshysynyń Jarlyǵymen Qazaqstan Respýblıkasy Prezıdentiniń janyndaǵy Ulttyq quryltaı quryldy.