Maksım Rojın Halyq keńesin ulttyq dıalogtyń jańa formaty dep atady

ASTANA. KAZINFORM — Halyq keńesin qurý qoǵam men memleket arasyndaǵy ózara is-qımyldy júıeli deńgeıge shyǵarady. Bul týraly Májilis depýtaty Maksım Rojın Konstıtýtsııalyq reformalar jónindegi komıssııanyń úshinshi otyrysynda málimdedi. 

Depýtattyń aıtýynsha, qazirgi qoǵam belsendi ári talapshyl sıpatqa ıe, al shashyrańqy qoǵamdyq alańdar men dıalog formattary árdaıym jalpyulttyq múddeni tolyq qamtı bermeıdi. 

Maksım Rojın Halyq keńesi «halyq únine qulaq asatyn memleket» qaǵıdatyn Konstıtýtsııa deńgeıinde turaqty tetikke aınaldyratynyn atap ótti.

Onyń pikirinshe, bul qurylym túrli daǵdarys jaǵdaılarynda qoǵamnyń ustanymyn eskeretin ári memlekettik sheshimder qabyldaýda halyqshyl alań qyzmetin atqarady.

— Halyq keńesi — ulttyq dıalogtyń jańa formaty. Bul qoǵamnyń zań shyǵarý úderisine tikeleı qatysýyna múmkindik beretin konstıtýtsııalyq tetik, — dedi Májilis depýtaty.

Depýtat sondaı-aq usynylyp otyrǵan konstıtýtsııalyq túzetýler bılik tarmaqtary arasyndaǵy tepe-teńdikti nyǵaıtyp, qoǵamdyq dıalogtyń ornyqty mehanızmin qalyptastyratynyn aıtty.

Aıta keteıik, buǵan deıin Parlament Májilisiniń depýtaty, zań ǵylymdarynyń doktory Únzıla Shapaq Konstıtýtsııanyń preambýlasyna qandaı ózgerister enetinin aıtqan edi.