Maksım otbasymyzdyń múshesi sııaqty edi - Sankt-Peterbýrgte qaza tapqan Aryshevtiń dosy
MÁSKEÝ. QazAqparat - Búgin 20.00-de «Sennaıa ploşad» stansasynda 3 sáýirde metroda lańkestiktiń saldarynan qaza tapqan Sankt-Peterbýrg memlekettik ekonomıkalyq ýnıversıtetiniń stýdenti 22 jastaǵy Maksım Aryshevti sońǵy saparǵa shyǵaryp salady. Onyń dostary estelik memorıal ornatady, dep habarlady «QazAqparat» HAA menshikti tilshisi.
«Maksım Aryshev - meniń dosym. Biz onymen Sankt-Peterbýrgte tanystyq. Ol ashyq, ázil-qaljyńǵa beıim keremet jan bolatyn. Ol júrgen jer kóńildi edi. Maksım meniń otbasymdy almastyrǵan. Úlken almatylyq otbasymyzdyń bir múshesi», - dedi onyń dosy Roman Zedelashvılı.
Romannyń aıtýynsha, Maksım aldyna maqsat qoıyp, ómirdi jaqsy kórgen. «Óziniń ómirlik josparlary bolatyn. Kásibi, jobalary jaıly únemi oılap júretin, - dedi ol.
«Sankt-Peterbýrgte dostary da kóp boldy. Olardyń barlyǵy Almatyǵa ushyp kele almaıdy. Sondyqtan búgin Sankt-Peterbýrgte Maksımmen qosh aıtysady».
Aıta keteıik, 3 sáýirde Sankt-Peterbýrgte eki stansa arasyndaǵy ótkelde jasalǵan lańkestik saldarynan 14 adam qaza taýyp, 50-den astam adam jaraqat aldy.
