Maksım Meıirlan Azııa chempıonatynda dzıýdodan qola júlde enshiledi

ASTANA. KAZINFORM — Qazaqstan quramasynyń sportshysy Maksım Meıirlan dzıýdodan Taılandtyń Bangkok qalasynda ótip jatqan Azııa chempıonatynda III oryn aldy, dep habarlaıdy UOK baspasóz qyzmeti.

Qazaqstandyq balýan 90 kelige deıingi salmaqta óner kórsetti. Maksım Meıirlan qola medal úshin bolǵan beldesýde tájikstandyq Ýmıd Radjabovty jeńdi. Nátıjesinde Qazaqstan quramasynyń qorjynyna kezekti qola júldeni saldy.

Aıta keteıik, dál osy salmaqta Ermahan Ánýarbekov te qola medal úshin kúresti. Alaıda ol japonııalyq Komeı Kavabataǵa ese jiberdi. Osylaısha, Qazaqstan quramasynyń qorjynynda tórt medal bar.

Buǵan deıin Ǵalııa Tynbaeva (48 kelige deıin), Sherzod Davlatov (60 kelige deıin) jáne Baqyt Qusaqbaeva (57 kelige deıin) qola medal jeńip alǵan bolatyn.

Osydan buryn Baqyt Qusaqbaeva dzıýdodan Azııa chempıonatynda qola júlde alǵanyn jazdyq.