Maksım Krıat jarystan alǵan áserimen bólisti
ASTANA. QazAqparat - Kásipqoılar arasynda trıatlonnan Qazaqstannyń ashyq chempıonatynda ekinshi oryn alǵan qazaqstandyq Maksım Krıat jarystan alǵan áserimen bólisti, dep habarlaıdy QazAqparat.
«Júldeli oryn úshin kúres óte aýyr, ymyrasyz boldy. Shynymdy aıtsam, ekinshi oryn alǵanyma kóńilim tolady. Óıtkeni, eki qarsylasym da ataqty sportshylar. Bul jarystarǵa 2015 jyldan beri qatyspaı biraz ýaqyt úzilis jasaǵan edim. Jaraqatym boldy. Tek ótken jyldyń jeltoqsan aıynan bastap daıyndaldym. Negizigi úshinshi oryn alamyn dep oılaǵan edim», - dedi ol.
Onyń aıtýynsha, úshinshi oryn alǵan ýkraındyq Vıktor Zemtsev Astanadaǵy jarysqa jaraqatymen kelgen.
«Máre syzyǵyn keskennen keıin ol aıaǵynyń aýyrǵandyǵyn moıyndady. Sol sebepti qarqynyn tómendetýge týra kelgen eken», - dedi Krıat.
Sonymen qatar ol jarysty uıymdastyrýshylarǵa rızashylyǵyn bildirip, týrnırdiń óte joǵary deńgeıde ótkendigin basa aıtty.
«Jarysty uıymdastyrýshylarǵa jeke rahmetimdi aıtqym keledi. Biz Trıatlon federatsııasymen birge jumys istedik. Ol adamdar sońǵy úsh kún boıy nebári 6 saǵat qana uıyqtaǵan shyǵar. Olar óte úlken jumys atqardy. Barlyq eriktiler men tóreshilerge de rızashylyǵymdy bildiremin. Qazaqstan kez kelgen jarysty laıyqty ótkizýge daıyn», - dedi sportshy.
Aıta keterligi, jarystarǵa 155 sportshy qatysty. Týrnır 1,8 shaqyrymǵa júzý, 90 shaqyrymǵa velosıpedpen jarys jáne 21,5 shaqyrymǵa júgirý boıynsha ótti. Úshsaıysqa 19 komanda qatysty. Ár komandada 3 adamnan bar.
