Maksım Bogatyrev Argentınada parakanoeden álem chempıony atandy
ASTANA. KAZINFORM — Qazir Argentınanyń Gýalegýaıchý qalasynda baıdarka men kanoede eskek esý marafonynan jáne parakanoeden álem chempıonaty ótip jatyr. Bul týraly eskek esý sporty túrlerinen Ulttyq federatsııanyń baspasóz qyzmeti habarlaıdy.
Erler arasynda parakanoeden VL1 sanatynda otandasymyz Maksım Bogatyrev altynnan alqa taqty. Ol jarystyń alǵashqy kúni 8 shaqyrym 200 metr qashyqtyqty 58 mınýt, 03.17 sekýndta baǵyndyrdy.
Maksım máre syzyǵyn ekinshi kesken brazılııalyq Gabrıel Nýnesten 9 mınýt, 11 sekýnd ozyp ketti.
Endi aldaǵy kúnderi Ulttyq qurama sportshysy baıdarkamen jarysta baq synaıdy.
Aıta keteıik, álemdik dodaǵa 38 elden 683 sportshy qatysyp jatyr. Barlyǵy parakanoeden 14 baǵdarlamada júlde sarapqa salynady.
Eske sala keteıik, Maksım Bogatyrev bıyl jazda Túrkistan qalasynda ótken lıtsenzııalyq Azııa chempıonatynda 2 kúmis medal jeńip alǵan.
Osyǵan deıin Azııa Para oıyndarynda Qazaqstannyń qorjynyna tórt júlde qosylǵanyn jazdyq.
