Maksım Bakıevtiń 200 mln dollaryn Qyrǵyzstanǵa qaıtarý protsesi bastaldy

BІShKEK.KABAR –QazAqparat – Qyrǵyz Respýblıkasynyń Prezıdenti Sadyr Japarov Alekseı Shırshovke tıesili «Dastan» korporatsııasynyń 100 paıyz aktsııasy jáne Maksım Bakıevtiń dúnıe-múlki memleket menshigine ótýi tıistigin aıtty, dep habarlaıdy QazAqparat «KABAR» agenttigine silteme jasap.

Prezıdent Sadyr Japarov «Dastan» TUK» AAQ-nyń burynǵy basqarma tóraǵasy A.Shırshovtyń ustalýy týraly mán-jaıdy aıtty.

«A.Shırshov týraly halyqqa tolyq málimet beremin. Bizdiń jumysymyzda jasyryn eshteńe joq. Osydan 6-7 aı buryn A.Shırshov kómekshilerim arqyly habarlasty. Olar maǵan ony qabyldaýdy suraǵanyn aıtty, ol Maksım Bakıevtiń 200 mıllıon dollary buǵattalyp jatqan bankti tapqanyn aıtypty. Men onyń Qyrǵyzstanda bar-joǵyn suradym, oǵan shetelden telefon arqyly habarlasqanyn aıtty», — dedi Sadyr Japarov.

Prezıdent Bas prokýratýraǵa, MUQK jáne ІІM-ge 2010 jyly oǵan qatysty qylmystyq isterdiń ne úshin jáne qandaı ister boıynsha qozǵalǵanyn bilý týraly dereý nusqaý bergenin atap ótti. Nátıjesinde A.Shırshovke qatysty birde-bir qylmystyq is qozǵalmaǵany, oǵan izdeý jarııalanbaǵany belgili bolǵan.

Sol kúni sol 200 mıllıon dollardy qaıtarý jumystary bastaldy. Sodan beri bul jumystyń 60-70%-y oryndalǵan.

Buǵan deıin habarlanǵandaı, 2019 jyldyń 20 naýryzynda respýblıkalyq bıýdjetke Maksım Bakıevtiń 4,5 mln dollary qaıtarylǵan.