Maqsatymyz - qazaq kúresin Azıada jáne Olımpıada oıyndaryna qosý - «Qazaqstan barysy» týrnıriniń bas tóreshisi
ASTANA. QazAqparat - Keshe elordanyń «Saryarqa» velotreginde qazaq kúresinen «Qazaqstan barysy» respýblıkalyq týrnıri bolyp ótti. Barsha sportsúıer qaýym kóz tikken baıraqty báseke kópshiliktiń kóńilinen shyqty. Bıylǵy jyly mamandar tóreshilerdiń áreketterine joǵary baǵa berýde. Osyǵan oraı, QazAqparat tilshisi «Qazaqstan barysy» týrnıriniń bas tóreshisi Marat Jaqyt myrzany áńgimege tartqan edi.
- Bıyl tóreshiler jaǵynan ádildikti baıqadyq. Ózińiz jaýapty synda bas tóreshi boldyńyz. Tórelik jasaý ońaıǵa soqpaǵan bolar?..
- Byltyrǵy tóreshilik jurtshylyq tarapynan úlken synǵa ushyraǵandyqtan, bıyl jyl basynan elimizdiń túkpir-túkpirinen eń úzdik degen tóreshilerdi iriktep, arnaıy semınar-keńester ótkizdik. 50-60 mamannyń arasynan 12-sin iriktedik te, solardyń ishinde fınalda 6 tóreshi tórelik etti. Jaýapty mindet júktelgen soń ony qoldan kelgenshe abyroımen atqaryp, senimdi aqtaý kerek. Kórermenderdiń yqylasyna qaraǵanda, qyzmetimizdi tıisti deńgeıde oryndap shyqqan tárizdimiz. Reseılik qonaqtar da rızashylyǵyn bildirip jatty. «Qazaqtardan úırener tusymyz kóp eken» deıdi. Endi osy mejeden túspeýimiz kerek.
- Siz osyǵan deıin «Qazaqstan Barysy» týrnırinde bas tóreshiniń kómekshisi qyzmetin atqaryp keldińiz. Sol kezderde, naqtyraq aıtsaq, 2012 jáne 2013 jyly tóreshiler óziniń jerlesterin, nemese, burynǵy jeńimpazdy taǵy da alǵa qaraı súıreıtin. Ádildikti belden basyp, jas balýandardy joldan qaǵatyn. Osyny moıyndaısyz ba?
- Árıne, ondaı jaǵdaılar bolatyn. Mine, bıyl bas tórelikti maǵan tapsyrdy. Ondaı buratartýshylyq bolǵan joq. Men barynsha ádil bolýǵa tyrystym. Ádil sheshtim dep oılaımyn. Halyq ta razy bolyp jatyr. Mine, bıyl 70 jasqa kelip jatyrmyn. Sonda da qazaqtyń tól kúresin damytsam degen jalǵyz nıetpen jantalasyp júrgen jaıymyz bar. Maqsatymyz - qazaq kúresin Azıada jáne Olımpıada oıyndaryna qosý.
- Búgingi eshkim oılamaǵan jas balýandardyń jeńis tuǵyrynan kóterilýi osy ádildiktiń jemisi deýge kelisesiz be?
- Árıne, kelisemin. Naǵyz myqty ádildik bar jerde jeńiske jetedi. Sýbektıvti pikir degen bolady. Keıbir tóreshiler ózine unaǵan balýandy fınalǵa qaraı súıreleıtini ras. Bizdi qurtatyn osy. Bul qazaq kúresiniń eteginen keri tartpasa, kósegesin kógertpeıdi. Al bir tóreshiler fınalda alyp deneli, iri balýandar beldesse tartysty, qyzyqty ótýi múmkin degen kózqaraspen jas ári dene bitimi jaǵynan kishkentaı balýandardyń jolyn bógep jatady. Mine, barlyq daý osydan bastalady.
- Endi aldaǵy ýaqytta mundaı ádil tórelik etý dástúri jalǵasyn tabady ǵoı...
- Árıne! Budan bylaı da kez kelgen jarysta ádil bolýǵa tyrysamyz. Aldaǵy ýaqytta ondaı kemshilikter birjola joıylady degen senimdemin.
