«Maqsatym - ulttyq qolónerdi damytý» - «Elbasyna tilek» baıqaýynyń bas júldegeri Aqtoty Qoılybaeva
ASTANA. 20 qarasha. QazAqparat - Astanada «Elbasyna tilek» balalar shyǵarmashalyshyq baıqaýy márege jetti, dep habarlady Astana qalasy ákiminiń saıty.
«Maqsatym - ulttyq qolónerdi damytý». - Osylaı degen Aqtoty Qoılybaeva kesteleý óneri arqyly «Elbasyna tilek» atty shyǵarmashylyq baıqaýdyń bas júldesin jeńip aldy. Bir jarym aı boıy kúndiz kúlki, túnde uıqy kórmeı eńbektengen keıipkerimiz dál osy jumysy arqyly ulttyq dástúrdi odan ári asqaqtatýǵa úles qossam, - deıdi.
«Men baıqaýǵa kesteleý óneri arqyly jasalǵan jumysymmen qatystym. Onda shańyraqty beınelep, «Shańyraq» degen ataý berdim. Óıtkeni, Qazaqstan - bir shańyraq astyna kóptegen ult ókilderi men ulystardy biriktire bilgen memleket», - deıdi Aqtoty.
Baıqaý - keleshek urpaqtyń Otanyna degen súıispenshilikterin oıatyp, óz eliniń tarıhy men mádenıetin tanytýdy maqsat etedi. Sondaı-aq, beıneleý óneri arqyly ulttyq dástúr men dızaın ónerin damytyp, shyǵarmashyl jastardyń oı-órisin keńeıtýge baǵyttalǵan.
Armat Bektasov, sýretshi, «Elbasyna tilek» baıqaýynyń qazylar alqasynyń múshesi:
«Atam qazaq «at shappaıdy, bap shabady, bap shappaıdy, baq shabady» degen eken. Biz bul baıqaýda beıneleý ónerine, qolónerge, sýretterdiń túsine basa nazar aýdardyq. Sondaı-aq, taqyrypty taýyp qoıý da eskerildi. Sondyqtan ónerge ulttyq ıdeologııany quraıtyn qural retinde kóp kóńil bólip jatyrmyz».
Baıqaýǵa balabaqsha tárbıelenýshileri, jalpy bilim beretin mektep oqýshylary, tehnıkalyq jáne kásiptik bilim berý mekemeleriniń stýdentteri qatysty. Jalpy, 400-den astam jumys qabyldanyp, onyń tek 70-i ǵana iriktelip, kórmege qoıyldy. Aıta ketý kerek, baıqaý erejesine sáıkes jumystar ár túrli tehnıkada jasalǵan. Onyń ishinde: toqyma materıaldarynan, aǵash jáne metaldan, akvarel men kollajdan jasalǵan jumystar bar.
