Maqsatym - polıtsııa qyzmetinde tıisti mindetterimdi abyroımen oryndaý – ál-Farabı Ten
Ol oryndarda quzyrly sala mamandary táýlik boıyna tynymsyz qyzmet atqaryp, halyqtyń saýlyǵyn saqtaý jolynda tynymsyz eńbek etti. Solardyń qatarynda Qyzylorda oblysy Jalaǵash aýdanynda jol polıtsııasy ákimshilik praktıka tobynyń memlekettık ınspektory qyzmetin atqaratyn ál-Farabı Ten bar, dep habarlaıdy QazAqparat tilshisi.
Qazaly aýdanynda 1992 jyly dúnıege kelgen ol 2017 jyldan beri Jalaǵash aýdanynda polıtsııa qyzmetinde eńbek jolyn bastady. Sodan beri jaýapty qyzmette jemisti eńbek etip keledi. Eldiń ishi bolǵannan keıin túrli jol-kólik oqıǵasy kezdesedi. Sondaı sátterde ol máseleniń anyq-qanyǵyn naqtylaý maqsatynda óz mindetin atqarady.
«Bizdiń qyzmetimiz ońaı emes. Keıde jol-kólik oqıǵasynyń neden bolǵanyn anyqtaý qıynǵa soǵady. Nátıjesinde oqıǵaǵa kináli adamdy anyqtaımyz. Olarǵa tıisti sharalar qoldanamyz. Polıtsııanyń negizgi mindetterine osylaısha zor jaýapkershilikpen qaraımyz. Men bul salany beker tańdaǵan joqpyn. Jaýapkershiligi zor mamandyq ekenin de bilemin. Bala kezimnen polıtsııa qyzmetine qyzyǵa qaraıtyn edim. Qazir ózim de sol jumystyń ortasynda júrmin. Maqsatym - polıtsııa qyzmetinde tıisti mindetterimdi abyroımen oryndap, qyzmette zor tabystarǵa jetý. Men buryn sportpen aınalystym. Taekvondodan túrli jarystarǵa qatystym. Qara belbeý ıegeri atandym», - deıdi ol.
Ál-Farabıdiń ata-anasy - qarapaıym jandar. Ákesi - Aleksandr Qazaly aýdanynda aldymen mádenıet salasynda qyzmet atqarǵan. Mýzykalyq aspaptyń barlyq túrin meńgergen. Ulty – koreı bolsa da qazaq halqynyń salt-dástúrin jaqsy meńgerdi. Keıinnen aýdandyq aýrýhanada mehanık bolyp eńbek etti. 2012 jyly dúnıeden ozdy. Anasy – Tamaranyń ulty qazaq, aýdanda memlekettik saqtandyrý ınspektsııasynda qyzmet atqaryp, búginde zeınet demalysyna shyqty.
«Ata-anamyz bizge ónegeli tárbıe berdi. Otbasynda tórt perzent tárbıeledi. Keıbirimizdiń esimimizdi qazaqsha qoıdy. Bizdiń úıde menen basqa Irına, Aınur esimdi eki qyz jáne Radık esimdi baýyrym bar. Ákemniń aqylymen biz ıslam dinin qabyldadyq», - dedi ol.
Ol karantın kezinde blokposta jumystyń ońaı bolmaǵanyn aıtady. Bul álemdi jaılaǵan qaterli indettiń aldyn alý baǵytynda jasalǵan úlken jumys dep sanaıdy.
«Bul oń sheshim boldy dep sanaımyn. Sonyń nátıjesinde elimiz naqty nátıjege qol jetkizdi. Ol indettiń betin qaıtarýǵa zor septigin tıgizdi. Iá, indet álem jurtshylyǵyn áli de oılandyryp tur. Oǵan selsoq qaraýǵa áste bolmaıdy. Barlyq azamattardan qaýipsizdik sharalaryn saqtaýyn suraımyn», - dedi ol.
