Maqsattardy oryndaý VII shaqyrylǵan Parlament depýtattarynyń qolynan keledi - Nurtóre Júsip
NUR-SULTAN. QazAqparat – Alǵa qoıǵan maqsattardy birlese oryndaý jańadan myna jetinshi shaqyrylǵan Parlament depýtattarynyń qolynan keledi. Bul týraly Parlament Senatynyń depýtaty Nurtóre Júsip málim etti, dep habarlaıdy QazAqparat tilshisi.
«Búgingi Parlament Palatalarynyń birlesken otyrysynda Memleket basshysy Qasym-Jomart Kemeluly Toqaev óte mazmundy baıandama jasady. Onda qol jetken jetistikter men Qazaqstan táýelsizdiginiń aldaǵy 30 jyldyǵy qarsańyndaǵy, tórtinshi onjyldyq elimizdiń negizgi basymdyq retinde Qazaqstandy qýatty memleketke aınaldyrý degen másele kóterildi. Osy aıtylǵan saıasatty qoldaımyz, quptaımyz. Ótkeni, memleket qýatty, adamdar qajyrly, jigerli bolmaıynsha alǵa jyljý qıyndaı beredi», - dedi N. Júsip.
Onyń paıymynsha, Memleket basshysynyń qoıyp otyrǵan talaby óte oryndy. Densaýlyq máselesine, bilim máselesine, azamattardyń ál-aýqatyn arttyrý máselesine birqatar jaqsy usynystar boldy.
«Sonymen birge qoǵamnyń ashyqtyǵyn qamtamasyz etý turǵysynda da úlken oılar aıtyldy. Ol kisiniń ózi aıtyp júrgen «Kúshti Prezıdent, yqpaldy Parlament, jaýapty Úkimet» degen qaǵıdalaryn qazirgi ómirde sheshimin tabýǵa tıisti úsh tirekti bolatyn bolsa, sony osylaı aıtýǵa bolady. Sonyń ishinde Parlamenttiń aldyna eki túrli mindet qoıdy. Onyń biri – sapaly zań shyǵarý, qabyldaý, ekinshisi Parlamentti búkil qoǵamdaǵy irili-usaqty máselelerdiń sheshimin tabatyn ortalyqqa aınaldyrý degen másele bolyp otyr. Bul da óte mańyzdy dep esepteımin. Sondyqtan Memleket basshysy alǵa qoıyp otyrǵan talaptaryn, alǵa qoıǵan maqsattardy birlese oryndaý jańadan myna jetinshi shaqyrylǵan Parlament depýtattarynyń qolynan keledi, oǵan Senat depýtattary úlken serpinmen atsalysady dep aıta alamyz», - dedi senator.
