Maqsatymyz – Ádil, Qaýipsiz, Taza jáne Ozyq Qazaqstan qurý – Memleket basshysy

ASTANA. KAZINFORM- Qazaqstandy Eýrazııadaǵy basty tranzıt habyna aınaldyrǵymyz keledi. Bul týraly Pákistannyń The News International gazetine suhbat bergen Memleket basshysy Qasym-Jomart Toqaev aıtty.

- Maqsatymyz – Ádil, Qaýipsiz, Taza jáne Ozyq Qazaqstan qurý. Bul rette biz «Zań jáne tártip» qaǵıdatyn bárinen joǵary qoıamyz. Al halqymyzdyń yntymaǵy qasterli qundylyq retinde qarastyrylady. Búgingi tańda Qazaqstan Ortalyq Azııadaǵy ekonomıkasy eń iri el sanalady. Byltyr joǵary ekonomıkalyq ósim tirkeldi. Al ishki jalpy ónim 300 mıllıard dollardan asty. Jan basyna shaqqandaǵy ishki jalpy ónim kólemi tarıhı mejege jetti. Investıtsııalyq saıasatymyz turaqty, ashyq ári túsinikti iskerlik orta qalyptastyrýǵa baǵdarlanǵan. Sonymen qatar biz taıaý jyldary Qazaqstandy tolyq tsıfrlyq memleketke aınaldyrýdy kózdeıtin strategııalyq mindetti oryndaýdy qolǵa aldyq, - dedi Qasym-Jomart Toqaev.

Prezıdent jasandy ıntellekt pen basqa da ozyq tehnologııalar belsendi engizilip jatqanyn atap ótti.

- Qazaqstandy Eýrazııadaǵy basty tranzıt habyna aınaldyrǵymyz keledi. Budan bólek, elimizdiń energetıka salasyn jappaı jańǵyrtýǵa kiristik. Bul oraıda sheteldik ınvestorlarmen birlesip iri jobalardy iske asyra bastadyq. Bul qadamnyń bári tańdaǵan jolymyzdyń qandaı ekenin kórsetedi. Maqsatymyz – ártaraptandyrylǵan, tehnologııalyq turǵydan ozyq ári álemdik deńgeıdegi báseke tótep bere alatyn ekonomıka qurý, halqymyzdyń turmys sapasyn jaqsartý, - dedi Memleket basshysy.

Budan buryn habarlanǵandaı, Prezıdent Qasym-Jomart Toqaev Pákistanǵa memlekettik saparmen bardy.