Maqsatym – kóp án aıtý emes, ólmeıtin án jazý – Sáken Qalymov

ASTANA. KAZINFORM - Ánshi, kompozıtor, sazger Sáken Jaqsylyquly «JIbek Joly» telearnasyndaǵy «Búgin LIVE» baǵdarlamasyna bergen suhbatynda shyǵarmashylyǵy men fonogrammaǵa qatysty kózqarasyn bildirdi.

Sóz barysynda ol keıbir jaǵdaılarda fonogramma qoldanýǵa týra kelgenin jasyrmady.

– Eshqashan fonogramma qoldanbadym dep aıta almaımyn. Kezinde boldy, sebebi televızııanyń talaby sondaı edi. Úlken kontsertterde apparatýra jandy daýysta aıtýǵa árkez múmkindik bermeıdi. Sondyqtan aýqymdy túsirilimderde zańǵa sáıkes fonogramma paıdalanyp jatamyz. Biraq jeke kontsertterimde nemese toıǵa barǵanda jandy daýyspen aıtýǵa tyrysamyn. Halyqtyń aldynda ózimdi yńǵaısyz sezinemin, kórermendi aldaǵym kelmeıdi. Sol úshin shaqyrylǵan jerge barǵanda meni jandy daýyspen tyńdasa eken deımin. Tabysym adal bolǵanyn qalaımyn, – dedi ol.

Ánshi fonogrammany shekteý týraly zańnyń qabyldanýyn qoldaıtynyn da atap ótti.

– Bul zań kúshine ense dep armandaımyn. Suhbattarda da jıi aıtamyn. Kópshilik: Sahna lastandy, árkim án aıta beredi, qalaı tazalaımyz? dep suraıdy. Tazartýdyń jalǵyz joly – zań shyǵarý. Fonogramma qoldanystan alynýy kerek. Sol kezde án aıta almaıtyndar ózinen ózi ketedi, sahnada naǵyz ánshiler ǵana qalady, – dedi Sáken Jaqsylyquly.

Ártis baǵdarlamalarǵa jıi shaqyrylatynyn, alaıda shyǵarmashylyq turǵyda aıtary bolmaǵandyqtan barmaıtynyn da aıtty.

– Baıaǵy eski ánimmen qaıta-qaıta shyǵa bergim kelmeıdi. Meniń maqsatym – kóp án aıtý emes, ólmeıtin án jazý, – dep túıindedi óner ıesi.

– Eske salsaq, Parlament fonogrammany paıdalanýdy shekteý týraly zańdy qabyldady.