Maqsat Úsenovtiń shekaradan asýyna bereshekti óndirýdegi kemshilik sebepshi bolǵan

ASTANA. QazAqparat - Maqsat Úsenovtiń salyq bereshegin sot arqyly óndirý sharasy qolǵa alynbaǵan, dep habarlaıdy Jeke sot oryndaýshylarynyń respýblıkalyq palatasynyń baspasóz qyzmeti.

Osylaısha Maqsat Úsenov salyq bereshegi bola tura shet elge alańsyz ushyp shyqqan.

«Salyq beresheginiń bolýy jeke tulǵaǵa Qazaqstan respýblıkasy aýmaǵynan ýaqytsha shyǵýǵa shekteý bolyp sanalmaıdy.  El aýmaǵynan shyǵýǵa ýaqytsha shekteý jeke tulǵaǵa  «Atqarýshylyq is júrgizý jáne sot oryndaýshylarynyń mártebesi týraly» QR Zańynyń 33 babyna sáıkes tek qana atqarýshylyq qujat (sot aktisi) bolǵanda ǵana qoldanylady.

Atqarýshylyq is júrgizý organdarynyń avtomattandyrylǵan júıesiniń málimetinshe Maqsat Úsenovke qatysty salyq bereshegin óndirip alý týraly sot aktisi jeke sot oryndaýshylardyń oryndaýyna kelip túspegen»,  - dep málim etti Jeke sot oryndaýshylarynyń respýblıkalyq palatasy.

Eske sala ketsek, Maqsat Úsenov Air Astana kompanııasynyń ushaǵynda kezekti jaǵymsyz áreketimen kózge tústi. Ushaq Bangkokke qonǵanda jergilikti polıtsııasy ony qamaýǵa almady. Ol Vetnamǵa saparyn jalǵastyrdy. Budan keıin Maqsat Úsenovtiń salyq bereshegi bar ekendigi málim boldy.