Maqsat Úsenov salyǵyn tóledi - qalalyq MKD
ALMATY. QazAqparat - Maqsat Úsenov kólik salyǵyn tóledi. Bul aqparatty qalalyq Memlekettik kirister departamentiniń baspasóz hatshysy Shyńdalı Zańǵar aıtty, dep habarlaıdy QazAqparat tilshisi.
«Azamat Maqsat Úsenov 2016 jylǵa kólik salyǵy retindegi memleket aldyndaǵy bereshegin 8 maýsymda 174 240 teńge tóledi. Onyń ishinde 138 362 teńge salyq bolsa, 35 878 teńge ósimi», - dedi Z. Shyńdalı.
Onyń aıtýynsha, endi atalǵan derek sot organdaryna berilmeıtin boldy.
Búǵan deıin Maqsat Úsenovtyń salyq bereshegi bola tura shetelge alańsyz ushyp ketkeni týraly habarlaǵan bolatynbyz.
Keıinirek, QR Ádilet mınıstrliginiń baspasóz qyzmeti onyń qalaısha shekaradan ótkeni týraly túsinikteme berdi.
«Boryshkerdi syrtqa shyǵa almaıtyn azamattar tizimine engizý úshin óndirip alýshy ony sotqa berýi tıis jáne sot sheshimi negizinde sot oryndaýshylary atqarý jumysyn bastaıdy. Sot oryndaýshylarynda atalǵan sot sheshimi bolmaǵandyqtan, Úsenov memleket aýmaǵynan shyǵýǵa ýaqytsha shekteý qoıylǵan azamattar tizimine enbeı qalǵan», - dep habarlady Ádilet mınıstrligi.
