Maqsat Úsenov «Eır Astananyń» «sur tizimine» engizildi
ALMATY. QazAqparat - Maqsat Úsenov «Eır Astana» kompanııasynyń «sur tizimine» engizildi, dep habarlaıdy QazAqparat tilshisi.
Almatyda ulttyq áýetasymaldaýshy kompanııanyń prezıdenti Pıter Fosterdiń tóraǵalyǵymen «Eır Astana» avıakompanııasynyń Ushýlar qaýipsizdigi jónindegi komıtetiniń otyrysy ótti. Jıynda Maqsat Úsenovtiń 2017 jyldyń 4 maýsymyndaǵy ushaq bortyndaǵy buzaqy əreketi talqylandy.
Aıta ketý kerek, Maqsat Úsenov Almaty-Bangkok reısinde biraz minez kórsetken bolatyn. Ol bortseriktiń talaptaryn oryndamaı, ən aıtyp qasyndaǵylarǵa biraz yńǵaısyzdyqtar týǵyzdy. Ekıpaj músheleri ınstrýktsııaǵa səıkes ony Bangkok polıtsııasyna tapsyrdy.
«Bortta azamat Úsenovti qosa alǵanda 70 jolaýshy boldy. Ushý barysynda ol áýe kemesinde bolý erejesin birneshe márte buzdy. Osyǵan baılanysty áýe kompanııasynyń ekıpajy barlyq protsedýralarǵa sáıkes jolaýshyny jergilikti ýaqyt boıynsha 8-30-da Bangkok áýejaıyna qonǵannan keıin Taıland polıtsııasyna tabystady. «Eır Astana» áýe kemesinde bolý erejesin buzý, bortta temeki shegýge jol berilmeıdi. Óıtkeni ol ushý qaýipsizdigine kedergi keltirip, ózge jolaýshylardyń jaısyzdyq týdyrady», - dep málim etken bolatyn áýe kompanııadan .
Al Pavel Koktyshev esimdi azamat Feısbýktegi óziniń paraqshasyna osy keleńsiz oqıǵa jaıynda jazyp, vıdeolardy da jarııalaǵan bolatyn. «Úsenov ushý barysynda ózin dóreki ustap, kórshileriniń mazasyn alýǵa tyrysty. Aldymen stıýardessadan temeki shegýge ruqsat surap, oǵan tipti 200 dollar da usyndy. Sońynda temeki shekken de sııaqty. Óıtkeni, stıýardessalar akti jasady», - dep jazdy ol.
Keıin Bangkok polıtsııasy Maqsat Úsenovti bosatty. Sebebi ol Vetnamǵa bara jatqan, al Bangkokqa tranzıtpen soqqan.
«Qazaqstandyq dıplomattarǵa Taıland astanasy quqyq qorǵaý organdarynyń ókilderi azamat Úsenovke qatysty tekserý júrgizilgendigin habarlady. Onyń Bangkokqa Vetnamǵa bara jatqan jolda tranzıtpen kelgeni anyqtaldy», - dep jazǵan bolatyn QR SІM baspasóz qyzmetiniń jetekshisi Ánýar Jaınaqov Feısbýktegi óziniń paraqshasynda.
«Azamat Úsenovtiń tarabynan tártipti jáne ekıpaj talaptaryn saqtaýǵa ýáde berilgennen keıin vetnamdyq áýe kompanııasy ony bortqa alýǵa kelisti. Osy jaǵdaıdy eskere otyryp Bangkok áýejaıynyń polıtsııasy buzaqyny tártiptik jazaǵa tartý úshin tutqynǵa alǵan joq. Osydan keıin azamat Úsenov jergilikti ýaqyt boıynsha saǵat 11-20-da Bankgokten Hoshımınge ushyp ketti», - dedi QR SІM baspasóz qyzmetiniń jetekshisi.
Osy jaıttar, eskerilip, Maqsat Úsenov ushý qaýipsizdigine qater keltiretin jolaýshy retinde «Eır Astananyń» tərtipsiz jolaýshylar tirkeletin «sur tizimine» ilindi.
Úsenov qaıtar jolda mundaı bassyzdyqty qaıtalaǵan jaǵdaıda «destrýktıvti jolaýshylar tizimine» enetini jəne ushýǵa múldem ruqsat etilmeıtini týraly eskertildi.
