Maqsat Týmalıev: Budan bylaı fýtbolshylardyń jalaqysy jarııalanbaıdy

Bul týraly klýbtyń bas dırektory Maqsat Týmalıev málimdedi.

Klýbtyń resmı saıtyna suhbat bergen Maqsat Týmalıev fýtbolshylardyń aılyqtaryn kópshilikke jarııa etý arqyly komandanyń birtutastyǵy men yntymaǵy joǵalatynyn aıtty.

Esterińizge sala keteıik, ótken maýsymnyń sońynda «Aqtóbeniń» eks-dırektory Dmıtrıı Vasılev komandadaǵy birqatar oıynshylardyń jalaqylaryn jarııalaǵan bolatyn.

Soǵan sáıkes, eń kóp aılyq Alekseı Şetkınniń enshisinde bolypty. Ol aıyna 9 mln. teńge alyp kelgen. Samat Smaqovtyń jalaqysy - 6 mln. teńge. Al bas bapker ıÝrıı Ýtkýlbaev 3,5 mln. teńge jalaqyny «qanaǵat» tutqan.

Biraq Vasılev óziniń jalaqysyn kórsetýdi «umytyp» ketken. Alaıda, keıin onyń da aılyǵy belgili boldy. Áý basta kórsetilgendeı 350 myń emes, aıyna 4 mln. teńge jalaqy alyp júrgen ol aqyry abaqtyǵa jabylyp tyndy.

«Ótken jyly fýtbolshylardyń jalaqylaryn jarııalady. Eshkimniń qoly joq, eshqandaı mór qoıylmaǵan jaı ǵana qaǵaz. Kesteniń bir shetinde famılııalary, ekinshi shetinde sandar. Onda da barlyq fýtbolshylardyń aılyqtary kórsetilmegen. Tańdap qana alǵan. Eshkim de mundaı qujatqa súıenip, «ıá, osyndaı bolǵan» dep aıta almaıdy», - degen Maqsat Týmalıev fýtbolshylardyń jalaqylaryn jarııalaýǵa nelikten qarsy ekendigin aıtyp berdi. - Ekinshiden, men fýtbolshylardyń aılyqtaryn az etip kórsetip, biraq jasyryn bonýstaryn aılyǵynan eki, tipti úsh ese kóp qylyp qoıatyndardy jaqtaıtyndardyń qatarynan emespin. «Aqtóbe» bıyl birinshi rette oıynshylary men jankúıerleriniń aldynda adal bolýdy kózdeıdi. Al fýtbolshylardyń jalaqylaryn jarııalaýdy durys dep eseptemeımin.

Sondaı-aq Týmalıev álem fýtbolynda da mundaı nárseni eshkim qoldamaıtynyn atap ótti.

«Meniń túsinigimde bul nárse ár fýtbolshynyń jeke sharýasy. Komandadaǵy oıynshylardyń jalaqylaryn jarııalaýdyń sońy ujymdaǵy alaýyzdyqqa, renishke, qyzǵanyshqa ákelip soqtyrýy múmkin. Fýtbolshylar tolyǵymen fýtbolǵa berilip, basqa nárselerdi oılamaıtyndaı bolýy tıis. Professıonal bolyp qalýy qajet. Byltyr fýtbolshylardyń jalaqylaryn jarııalaǵannan klýb áli de zardap shegip jatyr. Narazylyqtary men renishterin bildirgender kóp. Bıýdjet bar, biz soǵan jaýap beremiz. Mine, klýbtyń ustanymy osyndaı bolýy tıis», - dedi ol. 

Aıta keteıik, bul kúnderi «Aqtóbe» Túrkııada oqý-jattyǵý jıynyn ótkizýde. Klýb qaqpashy Andreı Sıdelnıkov, Damır Dáýitov, Berik Aıtbaev, Rafkat Aslan, jartylaı qorǵaýshylar Baýyrjan Baıtana, Rahymjan Rozybakıev jáne brazılııalyq legıonerler Kassıano, Vıtor Jýnıor, Jýnınomen kelisimshartqa otyrdy.

Derekkóz: Astana fýtbol federatsııasy