Maqsat Tolyqbaev «Qazaqstan halqyna» qory qamqorshylyq keńesiniń múshesi boldy

ASTANA. QazAqparat - «Qazaqstan halqyna» qoǵamdyq qory qamqorshylyq keńesiniń kezekti otyrysynda birqatar sheshimder qabyldandy, dep habarlaıdy QazAqparat.

Atap aıtqanda, jıynda «Tirek-qımyl apparaty buzylǵan balalardy robottandyrylǵan quraldarmen (ekzoskeletpen) qamtamasyz etý» qaıyrymdylyq baǵdarlamasyn iske asyrý merzimi 2023 jylǵa uzartylǵan.

Sondaı-aq qor málimetinshe, osy jyldyń 1 toqsanyndaǵy ishki aýdıtordyń 2 aýdıtorlyq is-sharasy – qordyń donorlary men strategııalyq áriptesterinen túsetin qarajat aýdıti jáne qordyń 2022-2023 jyldardaǵy baǵdarlamalary men jobalarynyń iske asyrylý aýdıti boıynsha esebi qaralyp, nazarǵa alyndy.

Barlyǵy 2023 jylǵa arnalǵan aýdıt jospary jyl ishinde ótkiziletin 5 aýdıtorlyq is-sharany qamtıdy.

Osy jospardyń oryndalýynyń monıtorıng nátıjesin ishki aýdıtor jyldyq esepte usynady.

Sonymen qatar, otyrysta qamqorshylyq keńestiń músheligine Májilis depýtaty, QR Prezıdenti janyndaǵy ulttyq quryltaı múshesi, qoǵamdyq-saıası, áleýmettik máselelerdi kóterip júrgen belgili telejúrgizýshi jáne jýrnalıst Maqsat Tolyqbaev saılandy.

Maqsat Tolyqbaev «Halyq súıiktisi – 2020», «Adal tulǵa – 2021», sondaı-aq «Úzdik telejúrgizýshi-2016, 2019» baıqaýlarynyń jeńimpazy.

2022 jyldyń qyrkúıeginen bastap «Habar» telearnasynda «Bizdiń maqsat» qoǵamdyq-saıası tok-shoýynyń júrgizýshisi.