Maqsat Tolyqbaı: «Damý» qory arqyly tómen paıyzben nesıe berý statıstıkasy qyp-qyzyl ótirik
ASTANA. KAZINFORM — Áleýmettik-kásipkerlik korporatsııalar keıbir ákimderdiń bıznes sýbektisine aınalyp ketken. Bul týraly Májilistiń jalpy otyrysynda depýtat Maqsat Tolyqbaı aıtty.
— Memleket bıznesti qoldaý retinde 4,5 trln teńge bergen. 20 jyldaı boldy, sanaýly kompanııa bar, jyl saıyn solardy saýyqtyrýǵa 100 mlrd-tap qarjy berip kelemiz. Iá, jaqsy isteıtinderi alsyn. Biraq, tıimdiligin kórsete almaıtyn kompanııalardy nege jarylqaı beremiz, nege baqylaý joq? Olar taýar kólemin qansha paıyzǵa arttyrdy, qansha salyq tóledi? Jumys ornyn qansha paıyzǵa kóbeıtti? Komıtette talaı aıtyldy, barlyǵy jasyryn. Qarjy mınıstrliginen surasań, lám-mım demeıdi. Bankke suraý salsań, memlekettik qupııa deıdi. Biz bireýdiń qaltasyndaǵy aqshany eseptep jatqanymyz joq, — dedi ol.
Májilismen bul salyqtyń aqshasy bolǵannan keıin árbir tıyny ekonomıkaǵa jumys isteýi tıis ekenin aıtty.
— Talapty kúsheıtpese bolmaıdy, baqylaý joq. Ekonomıkaǵa oń áseri bolmasa, keıbir kompanııalarǵa tıimsiz shyǵysty toqtatý kerek. Áleýmettik-kásipkerlik korporatsııalar keıbir ákimderdiń bıznes sýbektisine aınalyp ketken. «Damý» qorymen tómen paıyzben nesıe berip jatyrmyz deıdi, statıstıkasy qyp-qyzyl ótirik. 200 mlrd teńge bólingen. Biraq, ótinish bergenderdiń 40 paıyzy ǵana nesıe ala alǵan. Jobalardyń kóbi formaldy túrde jumys isteıdi. Bar qarjynyń ózi bızneske kesh jetip jatyr. Bıznesti qoldaýdyń biryńǵaı terezesi týraly kópten berip aıtyp kelemiz. Sóz júzinde bar, is júzinde jumys istemeıdi. Prezıdent tapsyrmasy nege oryndalmady. Platforma nege jumys istemeı tur?», — dep surady osy oraıda ol Premer-mınıstrdiń orynbasary — Ulttyq ekonomıka mınıstri Serik Jumanǵarınnen.
Saýalǵa jaýap bergen vıtse-premer eGov Business platformasy engizilgenin aıtty.
— Qazirgi ýaqytta platformada bıznesmenderge 3 mln 500 myńnan astam qyzmet kórsetildi. Platformaǵa jeke kabınet arqyly 78 myńnan astam bıznes ókili tirkeldi. Jumys bastalyp ketti. Endi ony ary qaraı damytý mindetimiz. Qazaqstandaǵy búkil bızneske memlekettik qoldaý jasaý maqsatymyz joq, — dedi ol.
Sonymen qatar ol bıznesti qoldaýǵa baǵyttalǵan «Іsker óńir», «Órleý» syndy baǵdarlamalardyń bar ekenin atap ótti.
Aıta keteıik, Májilistiń jalpy otyrysynda depýtattar Joǵary aýdıtorlyq palatanyń jeke kásipkerlerge memlekettik qoldaý sharalarynyń tıimdiligine qatysty esebin tyńdap otyr.
Otyrys barysynda Joǵary aýdıtorlyq palatanyń tóraǵasy Álıhan Smaıylov bıznesti qoldaý tetikteriniń kemshiligin atady.
