«Maqsat teńgege senimdi nyǵaıtý» - baspasózge sholý
***
Daǵdarysqa qarsy keshendi is-sharalardy júzege asyrý máselesi Elbasy Joldaýynyń barlyq baǵyttarynan kórinis tapqan. Bul oraıda ásirese daǵdarysqa qarsy is-áreketter men qurylymdyq jańǵyrýlardyń bes baǵyty belgilengen tórtinshi taraýdyń orny erekshe. Munda eń birinshiden, elimizdegi qarjy sektoryn turaqtandyrýǵa basa nazar aýdarylǵan. Ony júzege asyrýda Ulttyq bankke jáne onyń oblystardaǵy fılıaldaryna júktelgen jaýapkershilik joǵary. Ulttyq banktiń Batys Qazaqstan oblystyq fılıalynyń dırektory Ǵalııa Satybaldınamen «Egemen Qazaqstan» tilshisiniń arasyndaǵy áńgime osyndaı baǵytta órbigen. Basylym tilshisiniń barlyq saýalyna tushymdy jaýap bergen qarjyger: «Buǵan deıingi tájirıbe ekinshi deńgeıdegi bankterdiń bári birdeı el men turǵyndar úshin tıimdi túrde qyzmet ete bermeıtinin kórsetip otyr. Endeshe bulardan ne úmit, ne qaıyr. Stress- testileý júrgizýdiń qajettiligi de osynda. Eń bastysy, mundaı tabandy is-sharalar bank sektoryndaǵy turaqtylyqty ornyqtyrýǵa yqpal jasaı alady. Ári ekinshi deńgeıdegi bankterdiń yqtımal shyǵyndarynyń aýqymyn aıqyndaýǵa septigin tıgizedi. Taǵy bir aıtaıyn degenim, elge nesıe berýmen aınalysatyn bankter búgingi talaptarǵa jáne Joldaýda qoıylǵan mindetterge sáıkes kapıtaldandyrýdyń qajetti kólemin alýy kerek. Kóp jaǵdaılarda bulaı bola bermeıdi. Sondyqtan da belgilengen halyqaralyq standarttarǵa sáıkestilik te ornyǵa qoımaıdy. Qysqasy, stress-testileýge qatysty sharalar otandyq bankterdiń básekege qabilettiligin kótere alady», - deıdi. Suhbat «Maqsat teńgege senimdi nyǵaıtý» degen taqyryppen berilgen.
Elimizdiń bas basylymynda Ońtústik Qazaqstan oblysy ákiminiń orynbasary Saparbek Tuıaqbaevtyń maqalasy «Ońtústikke shetel ınvestorlary qarjy salýǵa nıetti» degen taqyryppen berilgen. Onda avtor Elbasy N.Nazarbaev óziniń «Ult Jospary qazaqstandyq armanǵa bastaıtyn jol» maqalasynda Qazaqstannyń maqsat-múddesi aıqyn ekendigin, damý joldary kezeń-kezeńimen Ult Josparynda túzilgendigin, álemdegi ozyq otyz eldiń qataryna qosylýǵa da áreket jasap jatqandyǵyn taldap, aldaǵy ýaqytta iske asatyn jumystardy kórsetip bergendigine basa nazar aýdarǵan. «Qazir qoldaǵy bar qarjyǵa qarap, jumys jasaý daǵdarys jaǵdaıynda serpindilik ákelmeıdi. Shetel ınvestorlarymen qatar ózimizdiń iri kásipkerlerimizdi qoldaı otyryp, jańa óndiris oryndaryn kóbeıtý jańa jumys oryndaryn ashýǵa múmkindik beredi. Ońtústikte osy baǵytta baǵdarlamalar qabyldanyp, ındýstrıaldyq aımaqtar boıynsha Elbasynyń tapsyrmalary tıimdi oryndalyp jatyr. Memleket basshysy negizdegen Ult Jospary jańa qazaqstandyq armanǵa jetkizetinin halqymyz da bilip, biraýyzdan qoldap keledi», - dep jazady S.Tuıaqbaev.
***
«Árkimniń januıasy ózinshe bir álem. Ol álemniń tirshiligi men baqyty er kisiniń adaldyǵy, janashyrlyǵy, erekshe meıirimi jáne áıeldiń kórsetýi qajetti shynaıy, baıypty ári opaly qurmetimen júzege asady. Musylman ǵalymdary tilge tıek etken osy bir sóz otbasylyq ómirimizdiń árbir sátinde bizder úshin daýa ispetti. Osy sekildi otbasylyq ómirimizge qajetti tórt sıqyrly nárse de bar: «Maqtaý, alǵys bildirý, kúlimsireý jáne táýekel», - dep jazady «Aıqyn» gazeti senbilik sanyndaǵy «Jaryńyzdy maqtap turasyz ba?» degen taqyryptaǵy maqalasynda. Avtordyń jazýynsha, jubaılar bir-birin árkez kótermelep, maqtap otyrýy tıis, sonda jaqsy ister eselenip jalǵasa túsedi. Jubaılardyń bir-birine degen syılastyǵy men janqııarlyqtaryna alǵys bildirýdi, túptep kelgende, adamgershilik pen sypaıylyqtyń talaby. «Sıqyrly tásilderdiń biri - kúlimsireý. Musylman bir psıholog erli-zaıyptylarmen jasaǵan kezdesýinde eki jaqqa da unamaıtyny qatýly qabaq ekenin aıtqan. Ókinishke qaraı, kúlimsiresek, bir jerimiz kemip qalatyndaı bolyp tyjyrynamyz. Anyǵynda bireýmen sóılese bastaǵanda sál ǵana kúlimsireýińiz onyń da ashylyp, sizge kóbirek nazar aýdarýyna kómektesedi. Qarym-qatynasqa jol ashatyn eń ońaı jol kúlimsireý ári otbasynda da kóbirek jyly júzdilik tanytý», - delingen maqalada.
***
«Astanada jańa jylda memlekettik baǵdarlama aıasynda shamamen úsh myńǵa jýyq páter salynbaq. Alaıda, halyq mundaı keleshek kókjıeginiń kúdikpen qarap otyr. Óıtkeni, tańdaýlylar tizimine olardyń ishinen sanaýly ǵana adamnyń iligetindigine senimdi», - dep jazady «Vremıa» gazeti. Basylymnyń atap ótýinshe, óńirlerdi damytý baǵdarlamasyn júzege asyrý aıasynda aǵymdaǵy jyly tek elordada 2500 páter salý josparlanǵan. Bılik málimetterine sáıkes kóppáterli turǵyn úıler elordanyń sol jaǵalaýynda boı kótermek. Al jalǵa beriletin páterler temir jol jáne kóptegen óndiristik nysandar aýdanynda jáne Kóktal eldi mekeninde salynbaq.
