Maqsat Bazarbaev «MuzArt» tobyna qaıtyp keldi
ASTANA. QazAqparat - Ánshi Maqsat Bazarbaev "MuzArt" tobyna qaıtyp keldi. Ol ary qaraı birge óner kórsetpese de, atalǵan toptyń 15 jyldyq mereıtoıynda jigittermen qosylyp án salmaq.
Bul týraly Stan.kz habarlaıdy.
2001 jyldyń sáýir aıynda qurylǵan topta alǵashqy jyldary Meırambek Bespaev, Sáken Maıǵazıev jáne Maqsat Bazarbaev óner kórsetti. 2005 jyly top quramyndaǵy Maqsat Bazarbaev jeke ánshilikke bet buryp, toptan ketti. Ánshiniń bul áreketin tyńdarmandary túrlishe túsindi. Biri "Meırambekpen gonorarǵa bola renjisti" dese, endi biri Bazarbaev mineziniń shataq ekenin aıtty.
Osylaısha 2005 jyly topqa Kenjebek Janábilov alyndy. Munymen qatar, 2008 jyly "MuzArt" tobynyń quramy jandy daýysta án shyrqaý maqsatynda aspaptarmen súıemeldeıtin mýzykashylarmen tolyqty.
Búginde qazaq estradasynyń kóginde juldyzdary jarqyrap, kórermenniń kózaıymyna aınalǵan "MuzArt" tobynyń qurylǵanyna 15 jyl toldy. Top esep berý kontsertin ótkizip, bas qalamyzdyń mádenı oshaqtarynda tyńdarmandarymen qaýyshpaq. Kontsertte jigittermen birge "MuzArttyń" eks-solısi Maqsat Bazarbaev án salatyn bolady.
