Maks Ferstappen «Formýla-1» Las-Vegas Gran-prıinde jeńiske jetti
ASTANA. KAZINFORM — «Formýla-1» jarysynyń 22-kezeńi Las-Vegas Gran-prıinde Nıderlandynyń Red Bull komandasynyń ókili Maks Ferstappen jeńimpaz atandy, dep habarlaıdy Anadoly.
AQSh-tyń Nevada shtatyndaǵy Las-Vegas qalasynda ótkizilgen jarysta trassanyń uzyndyǵy 6,2 km boldy, al jarys 50 aınalymnan turdy. ıAǵnı, jarysqa qatysýshylar osy 6,2 km joldy 50 ret aınalyp ótti.
Ekinshi pozıtsııadan start alǵan Ferstappen birden kóshbasshylardyń qataryna shyqty jáne jarysty 1 saǵat 21 mınýt 8,429 sekýnd nátıjesimen aıaqtady. Bul jeńis onyń aǵymdaǵy maýsymdaǵy altynshy, al karerasyndaǵy 69-shy jeńisi boldy.
Brıtandyq «Maklaren» komandasynyń sportshysy Lando Norrıs ekinshi orynǵa turaqtady. Úshinshi oryndy «Mersedes» komandasynyń ókili Djordj Rassell aldy, ol kóshbasshymen salystyrǵanda 23,546 sekýndqa artta qaldy.
Osy nátıjesiniń arqasynda Norrıs jeke esepte kóshbasshylyqty saqtap qaldy: onyń maýsym aıaqtalýǵa eki kezeń qalǵanda 408 upaıy bar. Jarysta tórtinshi oryndy aýstralııalyq Oskar Pıastrı («Maklaren») aldy, onyń upaıy — 378. Ferstappen 366 upaı jınap úshinshi orynǵa jaıǵasty.
Kelesi, 23-kezeń — Qatar Gran-prıi 30 qarashada ótedi. Onda Norrıs chempıondyq ataqty merziminen buryn rásimdeýi múmkin.
Las-Vegas Gran-prıinen keıin jarysýshylar men komandalar arasyndaǵy alǵashqy bes oryn tómendegideı boldy:
Pılottar:
1. Lando Norrıs (Ulybrıtanııa) — 408 upaı
2. Oskar Pıastrı (Aýstralııa) — 378
3. Maks Ferstappen (Nıderlandy) — 366
4. Djordj Rassell (Ulybrıtanııa) — 291
5. Sharl Lekler (Monako) — 222
Komandalar:
1. McLaren — 786
2. Mercedes — 423
3. Red Bull Racing — 391
4. Ferrari — 371
5. Williams — 117
Budan buryn qyrkúıekte «Formýla-1» Ázerbaıjan Gran-prıindegi jarysta Maks Ferstappen ekinshi ret jeńiske jetkeni málim boldy.
Sonymen qatar mamyr aıynda Maıamı Gran-prıiniń irikteý kezeńinde Maks Ferstappen qarsylastarynan oq boıy ozyq shyǵyp, jarystyń úzdigi atanǵan edi.
Osyǵan deıin «Formýla-1» jarysy Ózbekstanda ótýi múmkin ekeni aıtyldy.