Makron jeltoqsan aıynda Qytaıǵa memlekettik saparmen barady
ASTANA. KAZINFORM — Frantsııa prezıdenti Emmanıýel Makron Qytaı Halyq Respýblıkasynyń tóraǵasy Sı Tszınpınniń shaqyrýymen 3–5 jeltoqsan aralyǵynda Qytaıǵa memlekettik saparmen barady. Bul týraly QHR SІM-niń resmı ókili Lın Tszıan dúısenbi kúni habarlady, dep jazady Sınhýa.
Bul Emmanıýel Makronnyń Qytaıǵa tórtinshi memlekettik sapary bolady jáne Sı Tszınpınniń ótken jyly Frantsııaǵa jasaǵan tarıhı saparyna jaýap retinde uıymdastyrylatyn sapar bolyp sanalady. Sol sapar QHR men Frantsııa arasyndaǵy dıplomatııalyq qatynastardyń ornaǵanyna 60 jyl tolýyna arnalǵan edi.
Sapar barysynda Sı Tszınpın E. Makronmen kezdesip, qytaı-frantsýz qatynastaryn jańa jaǵdaıǵa beıimdeý baǵyttaryn talqylaıdy. Sondaı-aq eki eldiń lıderleri halyqaralyq jáne aımaqtyq mańyzdy máseleler boıynsha tereń pikir almasady.
Sonymen qatar, QHR Memlekettik Keńesiniń premeri Lı Tsıan men Qytaı Halyqtyq Uly Jınalysynyń Turaqty komıtetiniń tóraǵasy Chjao Letszı Makronmen jeke kezdesýler ótkizedi.
Lın Tszıanniń aıtýynsha, Frantsııa jańa Qytaımen elshilik deńgeıinde dıplomatııalyq qatynastar ornatqan alǵashqy iri batys derjavasy bolǵan. Qytaı-frantsýz qatynastarynyń uzaq tarıhy, erekshe qundylyqtary bar jáne mańyzdy mıssııany atqarady.
Sońǵy jyldary eki eldiń basshylarynyń strategııalyq jetekshiligimen barlyq deńgeıde tyǵyz almasýlar júrgizilip, praktıkalyq salada jemisti yntymaqtastyq jáne kópjaqty máselelerde tıimdi úılestirý baıqalady, dedi dıplomat.
Halyqaralyq jaǵdaıdyń ózgermeli jáne kúrdeli ahýalynda Qytaı Frantsııamen birge aldaǵy sapardy strategııalyq kommýnıkatsııany nyǵaıtý, pragmatıkalyq yntymaqtastyqty tereńdetý, kópjaqty formattardaǵy úılestirýdi belsendirý jáne qytaı-frantsýz qatynastarynyń jańa jetistikterine qol jetkizý múmkindigi retinde paıdalanýǵa daıyn.
Resmı ókildiń aıtýynsha, bul eki eldiń Eýropalyq odaqpen qatynastardy nyǵaıtýǵa, kópjaqty yntymaqtastyqty qoldaýǵa, sondaı-aq álemde beıbitshilik, turaqtylyq pen gúldenýge úles qosýyna múmkindik beredi.
Budan buryn Nıý-Iork polıtsııasy Donald Tramptyń korteji ótýine baılanysty Makronnyń kóligin ótkizbeı tastaǵanyn jazǵan edik.