Makron jappaı narazylyqtan keıin frantsýz halqyna úndeý jasaıdy
ASTANA. KAZINFORM — Frantsııa prezıdenti Emmanıýel Makron búgin, 18 qazanda, Parıj ýaqyty boıynsha saǵat 20:00-de halyqqa úndeý jasaıdy. Onyń málimdemesi eldiń kóptegen qalasynda jappaı narazylyq aktsııalary ótkennen keıingi kúni jarııalanbaq, dep habarlaıdy Kazinform agenttiginiń menshikti tilshisi.
17 qazanda Frantsııanyń túkpir-túkpirinde «Sary keýdesheliler» qozǵalysynyń, joǵary synyp oqýshylarynyń, stýdentterdiń, fermerler men kásipodaqtardyń qatysýymen narazylyq aktsııasy ótti.
Frantsııa Іshki ister mınıstrliginiń málimetinshe, sherýlerge shamamen 550 myń adam qatysqan. Onyń 110 myńǵa jýyǵy Parıjde bolǵan. Al kásipodaqtardyń, sonyń ishinde Jalpy eńbek konfederatsııasynyń (KJK) ókilderi qatysýshylar sany 800 myńǵa jetkenin málimdedi.
Senbi kúni keshke Emmanıýel Makron áleýmettik jelidegi paraqshasynda «Respýblıkada zorlyq-zombylyqqa oryn joq» dep jazdy. Ol prefektýra ǵımarattaryn, dúkender men ákimdikterdi búldirgen tártipsizdikke qatysýshylardyń jaýapkershilikke tartylatynyn aıtyp, quqyq qorǵaý organdary qyzmetkerlerine qoldaý bildirdi.
Frantsııa premer-mınıstri Sebasten Lekornıý zorlyq-zombylyq deńgeıin «óte joǵary» dep baǵalap, bılik «ózin qorqytýǵa jol bermeıtinin» málimdedi.
Aucune place pour la violence dans notre République. Ceux qui ont cassé, attaqué les préfectures comme les commerces, pillé jusqu’à nos mairies, seront poursuivis et punis. Aux forces de l’ordre, garantes du droit à manifester, je dis le soutien de la Nation. Nous ferons tous bloc face aux semeurs de chaos, qui ne cherchent qu’à abattre nos institutions et empêchent ceux qui expriment pacifiquement leurs revendications de le faire.
— Emmanuel Macron (@EmmanuelMacron) October 17, 2026
Jeksenbi kúni tústen keıin Makron premer-mınıstrmen jáne tıisti mınıstrlermen keńes ótkizedi. Osydan keıin frantsýz halqyna úndeý jasaıdy.
Narazylyqtar Emmanıýel Makronnyń prezıdent retindegi ekinshi merziminiń aıaqtalýy jáne 2027 jylǵy 18 sáýirge belgilengen prezıdent saılaýy qarsańynda ótip jatyr.
Buǵan deıin Parıj polıtsııasy 17 qazandaǵy narazylyq aktsııalaryna qatysqan 855 adamnyń ustalǵanyn habarlaǵan edi. Frantsııa polıtsııasy ustalǵandar sany rekordtyq kórsetkishke jetkenin málimdedi.
Aıta ketelik Parıj kóshelerin tazalaýǵa kommýnaldyq qyzmetkerler úsh ese kóp jumyldyryldy.
