Makron jaqyn arada áskerı qyzmetke erikti shaqyrý týraly jarııalaýy múmkin

ASTANA. KAZINFORM – Frantsııa prezıdenti Emmanıýel Makron 27 qarashada erikti áskerı qyzmettiń engiziletinin jarııalaýy múmkin, dep habarlaıdy Kazinform menshikti tilshisi.

Frantsýzdyq Le Figaro gazetiniń derekkózderi boıynsha, áskerge jylyna 10 myńnan 50 myńǵa deıin adamdy alý qarastyrylyp otyr.

Eriktiler 10 aıǵa deıin qyzmet ete alady. Bul rette jalaqysy birneshe júz eýro kóleminde bolady.

Frantsııadaǵy erikti áskerı qyzmet jobasy birneshe aı boıy talqylanyp keledi.

- Frantsııa qýatty armııasy bar, biraq sondaı-aq ujymdyq qaıta jańǵyrý múmkindigi bar kúshti el bolyp qalýy kerek, - dep málimdedi frantsýz kóshbasshysy senbi kúni Iohannesbýrg qalasynda (OAR) ótken G20 sammıtinde.

Frantsııa 1997 jyly prezıdent Jak Shıraktyń tusynda áskerı mindettilikti joıdy.

- Eýropadaǵy kóptegen kórshilerimiz ulttyq qyzmetti qaıta jandandyrý ústinde, - dedi Qarýly kúshter shtabynyń bastyǵy general Faben Mandon senbi kúni France 5 arnasynyń efırinde.

Ol sondaı-aq bul «elimizde saqtalýy tıis elementterdiń» biri ekenin atap ótti.

Makron erikti qyzmet ıdeıasyn osy jyldyń 13 shildesinde joǵary laýazymdy ofıtserler aýdıtorııasyna usyndy.

Frantsııa qarýly kúshterinde shamamen 200 myń belsendi jáne 47 myń rezervıst bar, jáne bul san 2030 jylǵa qaraı sáıkesinshe 210 myń jáne 80 myńǵa deıin artady dep kútilip otyr.

«Ulttyq birlestik» (RN) prezıdenti, eýrodepýtat Djordan Bardella áskerı qyzmetti qalpyna keltirýdi «qoldaıtynyn» málimdedi.

Senattaǵy sotsıalıster fraktsııasynyń tóraǵasy Patrık Kanner saqtyq tanytyp otyr.

- Men bul máselege óte saq qaraımyn. Búginde men kásibı armııaǵa senemin. Eger jastar ózderin elge arnaǵysy kelse, onda, árıne, men ony tolyqtaı qoldaımyn, - dedi ol jeksenbide France 3 telearnasyna bergen suhbatynda.

Buǵan deıin Frantsııada zeınetkerlik jas 64-ke deıin kóterilmeıtinin jazǵan edik.