Makron Toqaevty referendýmnyń tabysty ótýimen quttyqtady
ASTANA. KAZINFORM — Frantsýz tarapynyń bastamasy boıynsha Qasym-Jomart Toqaev Prezıdent Emmanıýel Makronmen telefon arqyly sóılesti, dep habarlaıdy Aqordanyń baspasóz qyzmeti.
Áńgimelesý barysynda frantsýz kóshbasshysy Qazaqstan Prezıdentin jańa Konstıtýtsııaǵa arnalǵan jalpyhalyqtyq referendýmnyń tabysty ótýimen quttyqtady. Ol atalǵan ýaqıǵanyń tarıhı mańyzyn, sondaı-aq eldi odan ári jańǵyrtý jolyndaǵy qaryshty qadam ekenin atap ótti.
Qasym-Jomart Toqaev Frantsııa Prezıdentiniń qoldaýy jáne referendým nátıjesine joǵary baǵa bergeni úshin alǵys aıtty.
Taraptar ekonomıkadaǵy, ásirese, ındýstrııa men energetıka salalaryndaǵy ózara yqpaldastyqqa kóńilderi tolatynyn, sondaı-aq osy baǵyttaǵy birlesken kúsh-jigerdi jalǵastyrýǵa beıil ekenderin jetkizdi.
Memleketter basshylary ekijaqty yntymaqtastyq jáne halyqaralyq kún tártibiniń ózekti máselelerin talqylaý maqsatynda aldaǵy ýaqytta kezdesýge ýaǵdalasty.
Budan buryn Shavkat Mırzıeev qazaq elin jańa Konstıtýtsııa referendýmynyń tabysty ótýimen quttyqtaǵan edi.