Makron parlament palatalarynyń tóraǵalaryn qabyldady

ASTANA.KAZINFORM — Seısenbi kúni tústen keıin Frantsııa prezıdenti Emmanýel Makron Senat pen Ulttyq Assambleıanyń tóraǵalary — ıAel Braýn-Pıve men Jerar Larshemen kezdesti, dep habarlaıdy Kazinform agenttiginiń menshikti tilshisi.

Le Figaro gazetiniń jazýynsha, Konstıtýtsııanyń 12-babyna sáıkes, eger memleket basshysy Ulttyq Assambleıany taratý týraly sheshim qabyldaǵysy kelse, ol mindetti túrde Senat pen Assambleıa tóraǵalarymen keńesýi tıis.

Elıseı saraıyndaǵy derekkózdiń málimetinshe, bul eki kezdesýdiń árqaısysy bólek ótkizilgen, alaıda kezdesýdiń naqty maqsaty jarııa etilmegen.

Sol kúni Frantsııanyń Sotsıalıstik partııasynyń kóshbasshysy Olıve Fore óziniń partııasy sársenbi kúni saǵat 10:00-de Sebastıan Lekornıýdiń shaqyrýymen Matınon saraıyna baratynyn málimdedi. Bul – prezıdent Makron otstavkaǵa ketkeli otyrǵan premer-mınıstrge tapsyrǵan sońǵy kelissózderdiń bir bóligi.

Olıve Foreniń aıtýynsha, barlyq solshyl partııalar, "Baǵynbaıtyn Frantsııadan" (LFI) basqasy, bul kezdesýge oń kózqaras bildirgen. Ol sondaı-aq solshyldardy Matınon saraıyna kirgizýdi qaıta talap etetinin aıtyp, «Frantsııa halqynyń tańdaýyna qurmet bildiretin ýaqyt keldi» dep málimdedi.

Al frantsýzdyń ońshyl oppozıtsııasynyń kóshbasshylary — Marın Le Pen men Jordan Bardella — Sebastıan Lekornıýmen kelissózderge qatysýdan bas tartty. Olardyń aıtýynsha, saıası daǵdarystan shyǵýdyń jalǵyz joly – merziminen buryn saılaý ótkizý.

Eske salsaq, Frantsııa prezıdenti Emmanýel Makron dúısenbi kúni premer-mınıstr otstavkaǵa ketkennen keıin, óz ákimshiligin saqtap qalý úshin Sebastıan Lekornıýge eki kún ýaqyt bergen edi.