Makron: Palestınaǵa qatysty BUU konferentsııasy keıinge shegerildi
ASTANA. KAZINFORM — BUU-nyń Nıý-Iorktegi shtab-páterinde 17 maýsymda ótýi tıis bolǵan Taıaý Shyǵys boıynsha halyqaralyq konferentsııa «logıstıka jáne qaýipsizdikke baılanysty máselelerge» oraı keıinge qaldyryldy, dep jazady TASS.
Bul týraly Frantsııa prezıdenti Emmanıýel Makron Elıseı saraıy taratqan baspasóz máslıhatynda málim etti.
— Biz bul konferentsııany logıstıka men qaýipsizdikke baılanysty keıinge shegerýge májbúrmiz, sebebi Palestına avtonomııasynyń basshylary BUU-ǵa kele almaıdy. Alaıda konferentsııa jaqyn arada mindetti túrde ótedi. Aldaǵy kúnderi biz óńirlik kóshbasshylarmen, eń aldymen Saýd Arabııasymen birlese otyryp, jańa kúndi belgileımiz, — dedi Makron.
Frantsııa prezıdenti bul keıinge shegerý Frantsııanyń Palestınanyń memlekettik derbestigin moıyndaýǵa jáne Izraılmen qaqtyǵysty sheshýdiń «eki memleket» qaǵıdatyn júzege asyrýǵa degen nıetine eshqandaı kúmán keltirmeıtinin atap ótti.
— Bizdiń maqsatymyz — Izraıldiń bar ekenin jáne onyń qaýipsizdigin moıyndaıtyn, demılıtarızatsııalanǵan Palestına memleketin qurý. Ol memleket halyqaralyq qoldaýǵa ıe bolýy kerek, — dedi ol.
Palestına máselesi jónindegi konferentsııa
17–20 maýsym aralyǵynda Saýd Arabııasy men Frantsııa BUU shtab-páterinde joǵary deńgeıdegi konferentsııa ótkizýi tıis bolǵan. Onyń maqsaty — Izraıl men Palestına arasyndaǵy qaqtyǵysty sheshýde «eki memleket» qaǵıdatyn ilgeriletý úshin jahandyq kúsh-jigerge serpin berý.
Buǵan deıin Makron bul joǵary deńgeıdegi forým Palestına memlekettigin moıyndaý úderisine jáne Izraıldiń beıbit ári qaýipsiz ómir súrý quqyǵyn tanýǵa jańa serpin beredi dep málimdegen edi.
Qazirgi tańda Palestına memleketi BUU-ǵa múshe 148 el tarapynan moıyndalǵan. 95 elde Palestınanyń elshilikteri men turaqty ókildikteri jumys isteıdi.
«Eki halyqqa – eki memleket» qaǵıdaty 1967 jylǵy shekaralar sheńberinde astanasy Shyǵys Ierýsalımde ornalasqan, Izraılmen beıbit ómir súrýge daıyn táýelsiz Palestına memleketin qurýdy kózdeıdi.
Buǵan deıin Makron Gaza beıbit turǵyndary shekken azap aıaqtalýy tıis ekenin atap ótken edi.