Makron otstavkaǵa ketpeıtinin málimdedi

ASTANA. KAZINFORM — Frantsııa prezıdenti Emmanıýel Makron týyndap jatqan saıası daǵdarys aıasynda óziniń otstavkaǵa ketý múmkindigin joqqa shyǵardy.

Bul týraly Makron JDNews basylymyna bergen suhbatynda aıtty.

Kútilgendeı, 8 qyrkúıekte Ulttyq jınalysta Fransýa Baırý basqarǵan úkimetke senim votýmyn ótkizý josparlanyp otyr.

Baqylaýshylar Baırýdyń úsh aı ǵana qyzmet etip, senimsizdik votýmy arqyly otstavkaǵa ketken onyń aldyndaǵy premer-mınıstr Mıshel Barneniń taǵdyryn qaıtalaýy múmkin ekenin joqqa shyǵarmaıdy.

Osy daǵdarys aıasynda Frantsııa prezıdenti otstavkaǵa ketý múmkindigin túbegeıli joqqa shyǵardy.

— Prezıdent bolý — bul seni ne úshin saılaǵan bolsa, sony oryndaý jáne eń bastysy, el úshin durys dep sanaǵan nárseni jasaý. Men muny alǵashqy kúnnen bastap istep kelemin jáne sońǵy sátke deıin isteımin, — dedi ol.

Buǵan deıin solshyl «Bas ımegen Frantsııa» partııasy 23 qyrkúıekte parlamentke Makrondy bılikten shettetý jóninde usynys engizetinin málimdegen bolatyn.

Elabe zertteý kompanııasy júrgizgen saýalnama nátıjesine sáıkes, suralǵandardyń 67%-y prezıdenttiń otstavkasyn qoldaıdy.

Saýalnamaǵa qatysqandardyń 69%-y Ulttyq jınalysty taratyp, parlamenttik saılaý ótkizý kerek dep esepteıdi.

Saýalnamaǵa 1000-nan astam adam qatysqan.

Budan buryn AQSh elshisi Makronǵa jazǵan haty úshin Frantsııanyń Syrtqy ister mınıstrligine shaqyrylǵany belgili boldy.