Makron men Starmer kelesi aptada Vashıngtonǵa barady
ASTANA. KAZINFORM — Aq úıdiń baspasóz hatshysy Karolın Lıvıtt Tramp dúısenbide Makronmen jáne beısenbide Starmermen kezdesetinin málimdedi, dep habarlaıdy Kazinform tilshisi.
Frantsııa prezıdenti Emmanýel Makron men Ulybrıtanııa premer-mınıstri Kır Starmer kelesi aptada Vashıngtonǵa baryp, AQSh prezıdenti Donald Tramppen kezdesedi.
Sapar aldynda eki eýropalyq kóshbasshy Ýkraına prezıdenti Vladımır Zelenskıımen sóılesti, ol Eýropada turaqty beıbitshilikti qamtamasyz etý úshin senimdi qaýipsizdik kepildigi qajet ekenin atap ótti.
Úsh kóshbasshy Reseı men Ýkraına arasyndaǵy qaqtyǵysty toqtatý úshin beıbit kelissózderdiń perspektıvalaryn talqylaıdy, dep habarlady AQSh-tyń ulttyq qaýipsizdik jónindegi keńesshisi Maık Ýolts.
AQSh Eýropanyń qatysýynsyz Reseımen bitimgershilik kelissózderdi alǵa jyljytyp jatyr dep alańdaǵan Eýropalyq kóshbasshylar 17 aqpanda Parıjde tótenshe sammıtke jınaldy. 19 aqpanda keńeıtilgen quramdaǵy kezdesý ótti, odan keıin Makron Frantsııa men onyń odaqtastarynyń Ýkraınaǵa qatysty «birtutas» ustanymyn qýattady.
Buǵan deıin Tramptyń Ýkraınany prezıdenttik saılaý ótkizýge shaqyryp, eldi qutqarý úshin tez arada bitimgershilik kelisimin talap etkeni habarlanǵan bolatyn.