Makron men Sholts Eýropa úshin jańa baǵyt qurýdy josparlap otyr
ASTANA. KAZINFORM – Frantsııa prezıdenti men GFR kantsleri AQSh prezıdentiniń Eýroodaq taýarlaryna baj salyǵyn engizý qoqan-loqqylary tusynda Eýropany kúshti jáne turaqty etý qajettigin málimdedi, dep habarlaıdy Euronews.
Emmanıýel Makron sózin Eýropaǵa baǵyttap, birlikti nyǵaıtýǵa, kóbirek ambıtsııa men batyldyq tanytyp, táýelsiz bolýǵa shaqyrdy. Bul málimdeme Parıjdegi Elıseı saraıynda Germanııa kantsleri Olaf Sholtspen kezdesýinde jasaldy.
Eki kóshbasshy AQSh-tyń jańa prezıdenti Donald Tramptyń EO ımportyna baj salyǵyn engizý qaýpi jaǵdaıynda Eýropany kúshti jáne turaqty etý qajettiligi týraly aıtty.
— Bizdiń ustanymymyz anyq: Eýropa — shamamen 450 mln adam turatyn úlken ekonomıkalyq keńistik. Biz kúshtimiz jáne birtutaspyz. Eýropa taısalmaı, jasyrynbaıdy, kerisinshe, syndarly jáne ózine senimdi seriktes bolady. Osy negizde biz AQSh-pen jáne Amerıkanyń jańa prezıdentimen tabysty yntymaqtasatyn bolamyz, — dep málimdedi Olaf Sholts.
Makronnyń pikirinshe, Parıj men Berlın transatlantıkalyq baılanystardy saqtaı otyryp, óz múddesin qorǵaýǵa qabiletti kúshti Eýropany qurýda jetekshi ról atqarýy kerek.
Makron frantsýz-german seriktestigi eýropalyq kúsh pen turaqtylyqtyń eń mańyzdy sharty bolyp qala beretinin atap ótti.
Eske sala keteıik, buǵan deıin Makron armııany nyǵaıtý úshin jas eriktilerdi tartýǵa nıetti ekenin jazǵan bolatynbyz.
