Makron kásipodaqtarǵa kelissóz usyndy, biraq zeınetaqy reformasy týraly emes

ASTANA. QazAqparat – Frantsııa prezıdenti Emmanýel Makron zeınetaqy reformasyna qarsy narazylyq aktsııasy kezindegi tártipsizdikti synǵa aldy. Resmı málimet boıynsha, 400-den astam polıtsııa qyzmetkeri zardap shekti, 500-ge jýyq adam ustaldy, dep habarlaıdy QazAqparat Euronews-ke silteme jasap.

Jańa manıfestatsııa týraly habarlandyrýǵa baılanysty Ulybrıtanııanyń jańa koroli III Karldyń alǵashqy sheteldik sapary keıinge qaldyryldy, ol jeksenbide Frantsııaǵa kelmek bolǵan.

Brıýsseldegi brıfıng kezinde Makron kásipodaqtarmen eńbek zańnamasy týraly kelissózder júrgizýge daıyn ekenin, biraq zeınetaqy reformasy talqylanbaıtynyn aıtty.

«Men sársenbide eńbek qyzmetiniń densaýlyqqa áseri, mansapty aıaqtaý, kásipti ózgertý, mansaptyq ósý, keıbir salalardaǵy jaǵdaılar men jalaqy sııaqty taqyryptar boıynsha alǵa jyljýǵa daıyn ekenimdi ózim atap óttim. Sondyqtan, olar osy máselelerdiń tóńireginde menimen kezdeskisi kelse, men kásipodaqtarmen sóılesýge daıynmyn», - dedi Frantsııa prezıdenti.

Buǵan deıin Frantsııa prezıdenti zeınetkerlik jasty 64-ke deıin kóterýdi kózdeıtin reforma – májbúrli qadam ekenin aıtqan bolatyn. Demokratııalyq Eńbek konfederatsııasy shıelenisti azaıtý úshin bul máseleni alty aıǵa keıinge qaldyrýǵa shaqyrdy, biraq Makron reformany shuǵyl túrde júrgizýdi talap etti.

Eske salaıyq, Frantsııada uzaq ýaqyt boıy zeınetaqy reformasyna qarsy aýqymdy narazylyq sharalary ótti. El boıynsha mıllıonǵa jýyq adam, sonyń ishinde bir ǵana Parıjde 300 myń adam kóshege shyqty.

Saýalnamalarǵa sáıkes, Frantsııa turǵyndarynyń 76%-y reformaǵa qarsy bolǵanymen, el boıynsha myńdaǵan narazylyqtarǵa qaramastan, Frantsııa senaty daýly reformany qoldady.

Frantsııa premer-mınıstri Elızabet Born zeınetaqy júıesine ózgerister engizý týraly zań jobasynyń parlamentte daýysqa salynbastan qabyldanǵanyn málimdedi.

Munan soń oppozıtsııa úkimetke senimsizdik votýmyn jarııalaıtynyn habarlady. Biraq, dúısenbide el úkimeti parlamentte jarııalanǵan senimsizdik votýmyn jeti daýyspen eńserdi.

Reformaǵa qarsy narazylyq aktsııalaryna búkil el boıynsha mıllıonnan astam adam qatysty.