Makron Izraıldiń Iranǵa jasaǵan shabýyldaryn dereý toqtatýǵa shaqyrdy
ASTANA. KAZINFORM — Frantsııa Prezıdenti Emmanýel Makron Irannyń ıadrolyq jáne ballıstıkalyq baǵdarlamalaryna qatysy joq Izraıl shabýyldaryn dereý toqtatýǵa shaqyrdy, dep habarlaıdy Anadoly.
Elıseı saraıy jarııalaǵan jazbasha málimdemede, Makron 18 maýsymda Izraıldiń Iranǵa jasaǵan shabýyldaryn talqylaý úshin Ulttyq qorǵanys jáne qaýipsizdik keńesin shaqyrǵany aıtylǵan.
— Prezıdent Irannyń ıadrolyq jáne ballıstıkalyq baǵdarlamalaryna qatysy joq nysandaryna qarsy Izraıl shabýyldarynyń údeýi men Iran men Izraılde beıbit turǵyndar arasyndaǵy qurbandar sanynyń artýyna alańdaýshylyq bildirdi. Bul áskerı áreketter óńirlik qaýipsizdikke úlken qater tóndiredi jáne dereý toqtatylýy tıis, — delingen málimdemede.
Makron Irannyń ıadrolyq jáne ballıstıkalyq baǵdarlamalary máselesin sheshýdiń jalǵyz joly kelissózder ekenin atap ótti. Sondaı-aq Frantsııa Prezıdenti Irannyń aımaqtaǵy is-áreketteri boıynsha dıalog bastaýǵa daıyn ekenin bildirdi.
Málimdemede Makron Frantsııanyń syrtqy ister mınıstri Jan-Noel Barroǵa aldaǵy kúnderi eýropalyq seriktestermen birlese otyryp, Izraıldiń Iranǵa jasaǵan shabýyldaryn toqtatýǵa baǵyttalǵan kelissózder bastamasyn qolǵa alýdy tapsyrǵany jazylǵan.
Sonymen qatar Makron Barroǵa osy eki elden ketkisi keletin frantsýz azamattary úshin qajetti sharalardy qabyldaýdy tapsyrdy jáne frantsýz azamattaryna atalǵan elderge barýdan bas tartýǵa qatań keńes berildi.
Aıta ketelik Iran prezıdenti Makronǵa Izraıl soqqysyn toqtatpaıynsha AQSh-pen kelissóz júrgizbeıtinin aıtqan edi.