Makron Iran men AQSh-ty Ormýz buǵazyn birlesip ashýǵa shaqyrdy
ASTANA. KAZINFORM – Frantsııa prezıdenti Emmanýel Makron Iran men AQSh bıligi arasynda úılestirý arqyly Ormýz buǵazyn ashýǵa shaqyrdy. Bul týraly Anadolý agenttigi jazdy.
Frantsııa prezıdenti Makron Eýropalyq saıası qoǵam sammıti qarsańynda Erevanda jýrnalıster aldynda sóz sóıledi.
Makron eki el arasynda ýaqytsha bitimge qol jetkizilgennen keıin AQSh prezıdenti Donald Tramppen jáne Iran prezıdenti Masýd Pezeshkıanmen kelissózder júrgizgenin aıtty.
– Bitim Lıvandy da qamtýy jáne Ormýz buǵazynyń qaıta ashylýyn kózdeýi tıis edi, – dedi ol.
Makron 17 sáýirde Parıjde Ormýz buǵazyndaǵy keme qatynasy erkindigin qamtamasyz etýge arnalǵan konferentsııa ótkenin eske saldy.
– Sol kúni AQSh-ta Ormýz buǵazyn buǵattaý týraly jarııalandy, – dedi ol.
Makron AQSh buǵazdy qaıta ashýǵa daıyn bolsa, bul tek quptarlyq qadam bolatynyn aıtyp, Frantsııanyń bastapqydan-aq osyndaı talap qoıǵanyn atap ótti. Sonymen birge Parıj qandaı da bir kúsh qoldaný operatsııalaryna qatyspaıtynyn, óıtkeni olardyń aýqymy naqty aıqyndalmaǵanyn jetkizdi.
Onyń aıtýynsha, buǵazdy qaıta ashý úshin arnaıy mıssııa qurylǵan, al onyń áskerı josparlaýy Londonda júrgizilgen.
– Biz onyń Iran men AQSh arasynda úılestirilgen túrde qaıta ashylǵanyn qalaımyz. Bul – Ormýz buǵazynyń turaqty túrde ashyq bolýyn qamtamasyz etýdiń jáne keme qatynasy erkindigin eshqandaı shekteýsiz ári tólemsiz saqtaýdyń jalǵyz joly, – dedi Frantsııa basshysy.
Makron sondaı-aq Lıvandaǵy bitim rejımin saqtaý asa mańyzdy ekenin aıtyp, taraptardyń tıisti mindettemeler alǵanyn atap ótti.
Eýropalyqtardyń qaýipsizdik salasynda óz sheshimderin qalyptastyryp jatqanyn aıtqan Makron bul baǵyttaǵy qadam 2022 jyly Eýropalyq saıası qoǵamdy qurý arqyly júzege asqanyn jetkizdi.
– Biz Ýkraınaǵa qaýipsizdik kepildikterin berý úshin «nıet bildirýshiler koalıtsııasyn» qurýǵa sheshim qabyldadyq. Biz muny arnaıy operatsııa men Ormýzdy bosatý mıssııasy aıasynda júzege asyrdyq, – dedi ol.
Makron eýropalyqtardyń «óz taǵdyryn óz qolyna alyp jatqanyn», qorǵanys pen qaýipsizdik shyǵyndaryn arttyryp, birlesken sheshimder ázirlep jatqanyn aıtty. Sonymen birge ol Eýropa bul qadamdardy eshkimge jaýap retinde jasap otyrmaǵanyn atap ótti.
Aıta keteıik, buǵan deıin Ońtústik Koreıa men Frantsııa Ormýz buǵazyndaǵy baqylaýdy kúsheıtetinin jazdyq.
