Makron: HAMAS-ty jazalaý kerek, biraq beıbit turǵyndar kináli emes
Frantsııa Prezıdenti Emmanıýel Makron Qazaqstanǵa resmı sapary aıasynda Maqsut Narikbayev University stýdentterine dáris oqyp, saýaldaryna jaýap berip jatyr. Taıaý Shyǵys jáne Izraıl men Palestına qaqtyǵysy týraly da pikir bildirdi, dep habarlaıdy Kazinform.
Aıtýynsha, Frantsııada Izraıldi de, Palestınany da qoldaıtyndar bar.
«Meniń kóshbasy retinde pozıtsııam qandaı? Bul jaı ǵana bir jerde oqı salatyn másele emes. Biz Izraılge jasalǵan terrorıstik shabýyldardyń barlyǵy durys emes dep esepteımiz. Biz osy memleketti qoldaımyz. Eshkim óz memleketinde bireýdiń óltirilgenin, myńdaǵan adamnyń ómiri qıylǵanyn qalamas edi. Bul terrorlyq shabýyldardy aıyptaýymyz kerek», - dep atap ótti Frantsııa basshysy.
Ekinshiden Makron halyqaralyq quqyqty saqtaý kerektigin aıtty.
«Terrorlyq HAMAS-ty jazalaý kerek, biraq sol jerde ómir súretin beıbit turǵyndar kináli emes, olardy qorǵaý kerek. Sol sebepti, Gazadaǵy turǵyndardy qorǵaý úshin, qutqarý úshin gýmanıtarlyq kómek jiberýdi suradyq, eshqandaı terrorlyq shabýylǵa qatysy joq adamdardy qorǵaý kerek dep esepteımiz.
Meniń kóńilim tolmaıtyn nárse – adamdardyń ómirin alalaıtyndar bar. Palestınalyqtardyń ómiri nemese ızraıldikterdiń ómiri mańyzdyraq degen aqylǵa qonbaıtyn pikirtalas bar. Meniń oıymsha, bul jerde jalpy adamnyń ómiri týraly, adamnyń qundylyqtary erekshe degen túsinikter aıtylýy kerek. Bul BUU-da negizdelgen. Sonymen bizdiń oıymyz – birinshiden, terrorızmmen kúresý, ekinshiden – halyqty qorǵaý, úshinshi – saıası dıalog qurý kerek», - dedi Emmanıýel Makron.
Eske salaıyq, Frantsııa Prezıdenti Emmanıýel Makron resmı saparmen Qazaqstanǵa keldi. Qasym-Jomart Toqaev Aqordada Frantsııa Prezıdenti Emmanıýel Makrondy qarsy aldy.
Qazaqstan men Frantsııa prezıdentteri shaǵyn quramda kelissóz júrgizdi. Makron bul sapar ekijaqty seriktestik úshin mańyzdy jylmen tuspa-tus kelip otyrǵanyn aıtty. Qazaqstan Prezıdenti óz sózinde Frantsııa – Qazaqstannyń Eýropadaǵy óte mańyzdy seriktesi ekenin atap ótti. Sondaı-aq, Prezıdent kezdesý kezinde bilim jáne ǵylym salasyndaǵy jobalardy qolǵa alýǵa erekshe kóńil bólingenin jetkizdi. Emmanıýel Makron qazaq mektepterine frantsýz tilin oqytý tájirıbesi qaıta oralǵany mańyzdy ekenin jetkizdi. Memleket basshysy Qasym-Jomart Toqaev álemdegi túrli saıası shıelenister men ekonomıkalyq daǵdarystar eldi alańdatyp otyrǵanyna toqtaldy. Frantsııa Prezıdenti memleketter arasyndaǵy qarym-qatynastyń frantsııalyq úlgisi týraly aıtty. Qasym-Jomart Toqaev pen Emmanıýel Makron eki memlekettiń resmı delegatsııalarynyń qatysýymen keńeıtilgen quramda kelissóz júrgizdi. Frantsııa prezıdenti Emmanıýel Makron Memleket basshysy Qasym-Jomart Toqaevpen Aqordadaǵy kezdesýi kezinde Qaraǵandy oblysynda qaza bolǵan shahterlerdiń otbasyna kóńil aıtty.
Memleket basshylarynyń kezdesýinen keıingi qos eldiń qarym-qatynasy qaı baǵytta damýy múmkin?
