Makron: Gaza beıbit turǵyndary shekken azap aıaqtalýy tıis

PARIJ. KAZINFORM — Frantsııa basshysy gýmanıtarlyq kómekti jetkizý úshin ótkizý beketterin ashýǵa shaqyrdy, dep jazdy Anadoly.

Gaza sektoryndaǵy beıbit turǵyndardyń shekken azaby toqtaýy tıis. Bul týraly Frantsııa prezıdenti Emmanýel Makron Izraıl premer-mınıstri Bınıamın Netanıahýmen telefon arqyly sóılesý barysynda aıtty.

Makron óziniń X (burynǵy Twitter) platformasyndaǵy málimdemesinde Netanıahýmen telefon arqyly sóıleskenin habarlady.

Ol Frantsııanyń Izraıl men onyń azamattarynyń qaýipsizdigin qoldaıtynyn rastady, biraq: «HAMAS-ty qarýsyzdandyrý — mańyzdy basymdyq, dál sol sekildi barlyq tutqyndardy bosatý da mańyzdy», — dep atap ótti.

Makronnyń aıtýynsha, tutqyndardy bosatýdyń jalǵyz joly — oq atýdy toqtatý.

Frantsııa prezıdenti gýmanıtarlyq kómek jetkizý úshin barlyq ótkizý beketterin ashýdyń beıbit turǵyndar úshin ómirlik mańyzy bar ekenin de aıtty.

— Men óz basym Egıpettegi El-Arısh qalasynda gýmanıtarlyq kómektiń shekaranyń ekinshi jaǵynda bógelip turǵanyn kórdim. Bul kómek múmkindiginshe tez jetýi tıis. Gaza turǵyndarynyń azap shegýi toqtaý kerek, — dedi Makron.

Sondaı-aq, ol bul aımaqqa shuǵyl túrde beıbitshilik qajet ekenin atap ótti.

Áńgime Izraıl premer-mınıstriniń uly ıAır Netanıahýdyń Frantsııa prezıdentine qatysty aıtqan qorlaý sıpatyndaǵy sózderinen keıin týyndaǵan janjal aıasynda órbidi.

Makron Palestınany moıyndaý múmkindigin aıtty.

Buǵan deıin Egıpetke jasaǵan eki kúndik sapardan keıin France 5 telearnasyna bergen suhbatynda Makron:

Frantsııa Palestınany moıyndaý baǵytyna qaraı jyljýy kerek, ári bul aldaǵy aılarda júzege asýy múmkin ekenin jetkizdi.

Ol bul qadamdy Saýd Arabııasymen birlesip ótkiziletin eki memleket qaǵıdaty boıynsha halyqaralyq konferentsııa aıasynda iske asyrýǵa nıetti ekenin aıtty.

2023 jylǵy 7 qazanda Izraıldiń Gazaǵa jasaǵan shabýylynan beri Ispanııa, Norvegııa, Irlandııa, Slovenııa, Armenııa, Bagam araldary, Trınıdad jáne Tobago, ıAmaıka jáne Barbados syndy elder Palestınany resmı túrde moıyndady. Osylaısha, Palestınany moıyndaǵan elderdiń sany 146-ǵa jetti.

Izraıl premer-mınıstriniń uly ıAır Netanıahý Makronnyń Palestınany moıyndaý týraly málimdemesine X jelisinde qatqyl reaktsııa bildirip, «Tozaqqa tús!» dep jazǵan edi. 

Eske sala keteıik, buǵan deıin Makron «Palestınany memleket retinde moıyndaýymyz ábden múmkin» dep málimdeme jasaǵanyn jazǵan bolatynbyz.