Makron Frantsııadaǵy jappaı tártipsizdikke qatysqandardy jazalaýǵa ýáde berdi
ASTANA. IKAZINFORM — 17 qazanda, senbi kúni Frantsııanyń iri qalalarynyń basym bóliginde jappaı tártipsizdik boldy. Osy oqıǵalarǵa baılanysty el prezıdenti Emmanıýel Makron áleýmettik jelide málimdeme jasady. Bul týraly Kazinform agenttiginiń menshikti tilshisi habarlady.
— Bizdiń respýblıkada zorlyq-zombylyqqa oryn joq. Ǵımarattardy qıratqan, prefektýralar men dúkenderge shabýyl jasaǵan, tipti ákimdikterdi tonaǵan adamdar jaýapqa tartylyp, jazalanady. Demonstratsııa ótkizý quqyǵyn qorǵaýǵa mindetti kúshtik qurylymdarǵa halyqtyń qoldaýyn bildiremin. Memlekettik ınstıtýttardy qıratýdy ǵana kózdep, óz talaptaryn beıbit túrde bildirgisi keletin adamdarǵa kedergi keltiretin búlik shyǵarýshylarǵa qarsy bárimiz birligimizdi kórsetemiz, — dep jazdy Emmanıýel Makron.
Bul málimdeme jappaı narazylyq aktsııalary ótkennen keıin jasaldy. Іshki ister mınıstri Loran Nýnestiń málimetinshe, sherýlerge shamamen 550 myń adam qatysqan. Al uıymdastyrýshylar qatysýshylar sany 800 myńǵa deıin jetkenin aıtady.
Parıj, Lıon, Marsel jáne Lımoj qalalaryn qosa alǵanda, birqatar eldi mekende beıbit sherýler sońy jappaı qıratý, órt qoıý jáne dúkenderdi tonaýǵa ulasty. Parıjdiń ortalyǵynda tonaýshylar kóptegen dúken men saýda ortalyǵyn oırandady.
Lımoj qalasynda tártipsizdik kezinde bir top adam shabýyl jasaǵannan keıin tarıhı ákimdik ǵımaratynan órt shyqty. Jalyn ǵımarattyń bir qanatyn sharpyp, shatyrǵa deıin jetti. Keıin qurylystyń bir bóligi opyrylyp tústi. Saǵat 20:00 shamasynda órt sóndirýshiler jalynnyń búkil ǵımaratqa taralýyna jol bermeýge tyrysty. Lımoj qalasyndaǵy tarıhı ákimdik ǵımaraty 1883 jyly paıdalanýǵa berilgen. Ǵımarattyń sáýlettik sheshimine Parıjdegi ákimdik úlgi bolǵan. Órt bolyp jatqan jerge júzdegen adam jınalyp, oqıǵany baqylaǵan.
17 qazan keshinde Marsel qalasynyń ortalyǵyndaǵy Centre Bourse iri saýda ortalyǵy da jappaı tonaldy. Kýágerlerdiń habarlaýynsha, saǵat 20:50–ge qaraı ortalyq túgeldeı derlik tonalyp, onyń ishinde birneshe júz adam bolǵan.
Kúni boıy qalada órt qoıý, qaqtyǵystar men dúkenderge shabýyl jasaý oqıǵalary da tirkeldi. Buǵan deıin betperde kıgen bir top adam ákimdik ǵımaratyna basyp kirip, ishki jabdyqtardy búldirip, Marıanna bıýstin qulatqan. Marsel qalasynyń meri Benýa Paıan zorlyq-zombylyqty aıyptap, ustalǵandar sany týraly esep berýdi talap etti. Onyń aıtýynsha, Makron qalaǵa qosymsha polıtsııa kúshterin jiberýge ýáde bergen.
Aldyn ala málimet boıynsha Frantsııadaǵy tártipsizdikter kezinde shamamen 400 adam ustaldy.
Ádilet mınıstri tártipsizdikke qatysqandardy qatań jazalaýdy talap etti
Frantsııanyń ádilet mınıstri Jerald Darmanın elde bolyp jatqan oqıǵalardy «aýqymy buryn-sońdy bolmaǵan qalalyq zorlyq-zombylyq» dep sıpattady.
— Búgin keshten bastap, sońǵy 48 saǵatta bergen nusqaýlarymdy basshylyqqa ala otyryp, barlyq bas prokýror men aıyptaýshyny elimizdi jaılaǵan zorlyq-zombylyqtyń deńgeıine saı barynsha qatań quqyqtyq sharalar qoldanýǵa taǵy da shaqyrdym, — dedi ádilet mınıstri.
Frantsııanyń premer-mınıstri Sebastıan Lekornıý ishki ister mınıstrliginde vedomstvoaralyq daǵdarys shtabyn qurdy. Onyń jumysyna ádilet mınıstri Jerald Darmanın men ishki ister mınıstri Loran Nýnes qatysty.
Bılik ókilderi áleýmettik talaptaryn beıbit túrde jetkizgen sherýshilerdi dúkenderdi tonap, ǵımarattardy qıratqan toptardan ajyrata bilý qajet ekenin atap ótti.
