Makron Frantsııadaǵy jappaı tártipsizdikke qatysqandardy qatań jazalaýǵa ýáde berdi
ASTANA. KAZINFORM — Frantsııa prezıdenti Emmanıýel Makron 17 qazandaǵy jappaı tártipsizdik kezinde dúkenderdi tonap, qoǵamdyq ǵımarattardy qıratqandar qatań jaýapqa tartylatynyn málimdedi. El basshysy zardap shekkenderge kómek kórsetilip, keltirilgen shyǵyn óteletinin aıtty, dep habarlaıdy Kazinform agenttiginiń menshikti tilshisi.
Makron jeksenbi kúni keshke eldegi jappaı tártipsizdikke baılanysty halyqqa teleúndeý jasady. Ol jaǵdaıdy «asa kúrdeli kezeń» dep atap, senbi kúni Frantsııanyń birqatar qalasynda narazylyq aktsııalary tonaý, qıratý jáne polıtsııamen qaqtyǵysqa ulasqanyn aıtty.
Prezıdenttiń sózinshe, radıkaldy solshyl toptardyń ókilderine kóptegen quqyq buzýshy qosylyp, qalalarda jappaı zorlyq-zombylyq jasaǵan. Dúkender tonalyp, Lımoj, Lıon jáne Marsel qalalaryndaǵy qoǵamdyq ǵımarattar men merııalarǵa shabýyl jasalǵan. Júzdegen polıtsııa qyzmetkeri men jandarm jaraqat alǵan.
— Muny eshbir aqtaýǵa da, túsindirýge de, keshirýge kelmeıdi. Búgin keshke bárimiz ashý men uıat sezimin bastan keshirip otyrmyz, — dedi Frantsııa prezıdenti.
Sonymen qatar Makron beıbit narazylyq bildirýshilerdi qoǵamdyq tártipti buzǵandarmen teńestirýge bolmaıtynyn atap ótti. Onyń aıtýynsha, aktsııaǵa qatysýshylardyń bir bóliginiń zańdy talaptary bolǵanymen, tonaý men qıratýǵa barǵandar jaýap berýi kerek.
— Búlik shyǵarǵandar men zorlyq-zombylyq jasaǵandarǵa qatysty tabandy áreket etemiz. Tyńdaý jáne dıalog júrgizý álsizdik nemese jazasyzdyq degendi bildirmeıdi, — dedi ol.
Prezıdent quqyq buzýshylardy jaýapqa tartýdy talap etip, keltirilgen shyǵynnyń ótelýi kerektigin málimdedi. Sondaı-aq quqyq qorǵaý organdaryna, ákimderge, zardap shekken kásipkerler men qolónershilerge qoldaý bildirdi.
Dúısenbiden bastap premer-mınıstr Sebasten Lekornıý zardap shekkenderge jedel kómek kórsetý jónindegi daǵdarys tobyn basqarady. Makron Іshki ister mınıstri Loran Nýnesti qosa alǵanda, úkimet múshelerine oqıǵadan tıisti qorytyndy shyǵarýdy, ásirese qaýip-qaterdi aldyn ala anyqtaý jáne barlaý jumystaryna qatysty sharalardy qaıta qaraýdy tapsyrdy.
Qajet bolǵan jaǵdaıda prefektiler men ákimder qoǵamdyq ǵımarattar men dúkenderdi qorǵaý úshin jekelegen jıyndarǵa tyıym sala alady. Aldaǵy kúnderi premer-mınıstr saıası partııalar, kásipodaqtar jáne stýdentter ókilderimen kezdesip, zorlyq-zombylyqty aıyptaý jáne jaǵdaıdy sheshý joldaryn talqylaıdy.
Alty aıdan keıin ótetin prezıdenttik saılaýdy eske salǵan Makron eldi tártip pen sabyrǵa shaqyrdy. Onyń pikirinshe, saıası pikirtalastar kóshedegi zorlyq-zombylyq arqyly emes, saıası partııalar arasyndaǵy ashyq pikir almasý arqyly ótýi kerek.
Frantsııa Іshki ister mınıstrliginiń málimetinshe, 17 qazandaǵy narazylyq aktsııalaryna el boıynsha shamamen 550 myń adam qatysqan. Eki myńnan astam adam ustalǵan.
Makronnyń teleúndeýi Elıseı saraıynda premer-mınıstrmen jáne tıisti mınıstrlermen ótkizgen keńesinen keıin jasaldy.
