Makron Frantsııa kommýnasynda pyshaqpen jasalǵan shabýyldy terakt dep atady

ASTANA. KAZINFORM — Frantsııanyń shyǵysyndaǵy Mıýlýz kommýnasynda Aljır týmasynyń pyshaqpen jasaǵan shabýyly terrorıstik akt sanalady.

Bul týraly Frantsııa prezıdenti Emmanýel Makron málimdedi, dep jazady TASS aqparat agenttigi BFMTV telearnasyna silteme jasap.

— Prokýror bul isti Ulttyq terrorızmge qarsy prokýratýraǵa tapsyrdy. Óz kezeginde olar ony terrorlyq áreket retinde anyqtaǵan. Sondyqtan bunyń ıslamdyq terrorlyq áreket bolǵanyna esh kúmán joq, — dedi Makron.

Frantsııa prezıdenti eldiń Іshki ister mınıstri Brýno Retaıoǵa qaıǵyly oqıǵa bolǵan jerge barýdy tapsyrdy. Ol bolǵan oqıǵaǵa qatysty egjeı-tegjeıli túsinikteme bermeıtinin aıtty, degenmen keshke ІІM basshysy oqıǵanyń qalaı bolǵanyn aıtyp beredi dep ýáde etti.

Pyshaqpen qarýlanǵan adam senbi kúni tústen keıin Frantsııanyń shyǵysyndaǵy Mıýlýz qalasyndaǵy bazardyń janynda ótip bara jatqan qala turǵyndaryna shabýyl jasady. Saldarynan úsh polıtsııa qyzmetkeri jaraqat aldy. Sonymen qatar qarýly terrorısti toqtatpaq bolǵan adam alǵan jaraqattarynan oqıǵa ornynda qaza tapty. Qazir shabýyl jasaǵan adam ustaldy.

Frantsııanyń Ulttyq terrorızmge qarsy prokýratýrasy kisi óltirdi degen kúdikpen jasalǵan shabýylǵa jáne «terrorlyq áreketke baılanysty bılik ókilderin óltirýge oqtalýǵa» qatysty tergeý bastalǵanyn málim etti. 

TF1 telearnasynyń habarlaýynsha, shabýyl jasaǵan adam Aljırden kelgen 37 jastaǵy azamat bolyp shyqty. Oǵan Frantsııa aýmaǵynan ketý týraly buıryq berilgen kórinedi. Budan bólek 10 jyl ishinde oralýǵa tyıym salyndy. Shabýyl jasalǵan kúni ol sottyq baqylaý sharalarynyń saqtalýyn rastaý úshin jergilikti komıssarıatqa kelýi kerek edi.

Osyǵan deıin Frantsııa bıligi lańkestikti nasıhattaǵan úsh blogerdi qamaýǵa alǵany belgili boldy.